Merkel në Tiranë: Gjermania dhe BE, interes në anëtarësimin e Ballkanit

Kancelarja e Gjermanisë, Angela Merkel, pas vizitës së djeshme në Beograd sot vizitojë Tiranën duke e filluar me takimin me Kryeministrin e Shqipërisë, Edi Rama në Pallatin e Brigadave për të përfunduar me takimet kokë më kokë me çdo Kryeministër të Ballkanit.

Për këtë nder që i bëri Kancelarja Merkel në vizitën e saj të fundit në këtë post, Kryeministri Edi Rama i dhuroi Kordonin e madh me yll të Medaljes së Kryeministrit për Mirënjohje Publike.

“Ky është ylli i Mirënjohjes dhe është simboli i Heroit tonë kombëtar Skënderbeut, i cili mbrojti Shqipërinë nga pushtimi dhe u mbiquajt si ‘Atleti i Krishit’, si mbrojtës i krishtërimit. Kështu, mendoj se ju detyrohemi për këtë. Nuk do mbaj fjalim këtu se e di që ju nuk para i duroni ceremonitë ndaj vetëm le të mjaftohemi me foton,” shpjegoi Kryeministri Rama ndërsa Kancelarja Merkel shtoi:

“Faleminderit shumë! Jam e vetëdijshme se është një nder i madh dhe ishte gjë e mirë për mua të punoja me ju. Faleminderit!”

Nga Pallati i Brigadave, Merkel dhe Rama vazhduan rrugën drejt Tirana Business Park ku Kancelarja pa nga afër mjediset e investimit më të ri gjerman në Shqipëri, aty ku u takua dhe me liderët e rajonit, në siç tha, tokë gjermane.

“Planifikova të vija tek te secili nga vendet tuaja, por rezultoi e pamundur. Duheshin 3-4 ditë”, tha Merkel, duke e cilësuar veten mikpritëse, pasi siç tha ajo “është tokë gjermane këtu, sepse është investim gjerman”.

Kryeministri Edi Rama shumë gjëra nuk di të bëjë ama servilin, e bënë edhe me lider që nuk i durojnë zvarritjet. Gjithsesi, ai e qujati ditën e sotme një ditë të bukur dhe të trishtuar, pasi përkon me vizitën e Merkel, por edhe nga ana tjetër është vizita e saj e fundit që bën në Tiranë në detyrën e kancelares.

“Do të them që kjo është njëkohësisht një ditë e bukur për ne dhe një ditë e trishtuar. Është një ditë e bukur sepse kemi privilegjin që të presim në Tiranë një mike të ballkanit, të shqiptarëve dhe popujve të këtij rajoni. Është dhe ditë e trishtuar, pasi në një farë mënyrë kjo është dhe vizita e lamtumirës së Angela Merkel si kancelare e Gjermanisë. Besoj se askush nuk ka bërë për këtë rajon pas kapërcimit të luftës më shumë se sa kancelarja gjermane. Ajo që është akoma më e rëndësishme, është se askush nuk e ka kuptuar këtë rajon më mirë se sa kancelarja gjermane. Me kancelaren është gjithmonë një problem se nuk i ka qejf fjalimet me shumë fjalë të bukura, por njëkohësisht është shumë e sinqertë edhe shprehja e fjalëve më të mira lidhur me çka ajo bëri duke iniciuar procesin e Berlinit, një proces i cili është një vizion largpamës, jo thjesht për të kaluar një fazë disa vjeçare, por për ta parë të ardhmen të gjithë së bashku. Përtej të gjitha rezultateve konkrete, në aspekt me fushatë që mbulon ky proces, ku me rëndësi është vendosja e një fushe bashkëpunimi, bashkëveprimi dhe sensin e të ardhmes së përbashkët,” tha Rama duke shtuar se ishte privilegj që kancelarja të ishte në Tiranë, në pamundësi për të vizituar gjithë vendet, dhe këtu të kishim edhe takimet bilaterale me gjithë liderët.

“Dua t’i shpreh mirënjohjen, falenderimit në emër të shqiptarëve, për atë që Gjermania ka bërë për Shqipëri dhe kancelarja personalisht ka bërë për rajonin. Duke respektuar maksimalisht faktin që kancelarja është një lider që drejton Gjermaninë prej shumë e shumë vitesh por asnjëherë s’ka munguar t’i japë zemër politikës, por është gjermane dhe kohën e ka të shtrenjtë oraret të rëndësishme, s’dua të marr kohë më të gjatë. Sot ballkani është një vend shumë më i mirë sec ishte para se Merkel të niste procesin e Berlinit, pavarësisht se do të ketë vazhdimësinë, Merkel do i mungojë këtij rajoni.”

Pavarësisht se shumë sfida mbeten të pazgjidhura, tha Rama, pa kancelaren Merkel, Ballkani nuk do ishte njësoj si sot.

“Mirënjohje e falenderime, ishte një privilegj, nder kënaqësi që unë të kisha këtë detyrë në të njëjtën kohë me të, të kisha mundësinë të mësoja prej saj. Sipas meje, sot është një moment kur të gjithë ne jemi të vetëdijshëm qoftë për cfarë ka bërë e qoftë për boshllëkun që ajo lë. Pa kancelaren Merkel Ballkani nuk do ishte njësoj si sot, as Europa pavarësisht sfidave e problemeve që mbeten të pazgjidhura,” tha Kryeministri Rama duke përfunduar:

“Merkel tani do të jetë më e lirë e shpresoj të ketë kohën e dëshirën të kthehet në Ballkan për të lexuar më nga afër realitetin tonë, për t’u shperblyer me deti natyrën e humorin e Ballkanit që në këtë fushë është shumë më parë se BE.”

Ndërsa Kancelarja gjermane Angela Merkel, tha se është në interes të Gjermanisë dhe BE që Shqipëria dhe vendet e Ballkanit të jenë pjesë të BE, e që të arrihet kjo duhen plotësuar kushtet e vendosura nga BE.

“Do të vijoj bisedat bilaterale me vendet e tjera të Rajonit. Më 8 tetor do të takohemi sërish, në Slloveni. Ishin biseda të mira, konstruktive, do të doja t’ju falendroja. Unë jam e bindur që në këndvështrimin gjeostrategjik, BE dhe Gjermania ka interes të vetin në anëtarësimin e këtyre vendeve në BE, por sigurisht është diçka tjetër procesi i integrimit rajonal. Këtë e shpreh shprehimisht që të punoni në këtë drejtim. Zemra ime rreh për këtë rajon edhe pse s’do të kem detyrën që të vij si zyrtare këtu,” tha Merkel

Lidhur me integrimin, ajo u ndal te procesi i anëtarësimit të Shqipërisë dhe Maqedonisë së Veriut në BE, ku Bullgaria përdori veto dhe BE kryesohej nga Gjermania.

“Unë sigurisht që nuk kam ndërmend të luaj rol aktiv politik, por do të jem mike e rajonit, do të jap këshilla. Përvojat për veton janë bërë disa herë, nuk ka të bëjë vetëm me rastin e Shqipërisë dhe Maqedonisë së Veriut. Unë jam shpresëplotë. Kemi bërë një farë pune, kemi pasur disa arritje. Sigurisht Maqedonia e Veriut dhe Shqipëria kanë pasur mbështetjen e të gjitha vendeve të BE për të hapur negociatat, e kemi fjalën për konferencën ndërqeveritare,” tha Merkel ndërsa u pyet edhe në Tiranë nëse mendon se “Procesi i Berlinit” ka dështuar.

“Jo në fakt se konsideroj si të tillë. Nuk mendoj se është mbaruar ndërtimi i autostradave. Janë planifikuar, janë procese që janë iniciuar, kemi shkëmbime në nivel shkencor. S’ka ndodhur gjithçka. Sa i përket bashkëpunimit në nivel të organizatave joqeveritare, jam takuar me një kryetar të një organizate këtu te ju. BE ndoshta nuk është aq i shpejtë në këtë drejtim, por është në rrugë të duhur,” tha Kancelarja Merkel ndërkohë Edi Rama shfrytëzoi momentin për ti bërë reklam “Open Ballkan” të cilin përveç tij dhe Presidentit të Serbisë, Aleksandar Vuçiç, nuk e njehë njeri, aq më shumë kur Kancelarja Angela Merkel edhe në Beograd e bëri të qartë se fillimisht shtetet duhet të njohin njëra-tjetrën:

“Duhet ta shohim këtë proces në këndvështrim historik. Kur kancelarja na ftoi në 2014-ën, ishte hera e parë në historinë e këtij rajoni, që liderët e të gjitha vendeve uleshin në një tryezë, jo për t’u vrarë dhe as për t’u thirrur, dhe për të folur për të ardhmen. Për të vazhduare argumentin e saj, ky proces i hapi rrugë një vendosjeje të një komunikimi mes Serbisë dhe Kosovës. ‘Procesi i Berlinit’ ka nevojë për kohën e vetë, mekanizmat për t’u vënë në lëvizje, janë të avashtë. Por ama dhe ‘Ballkanin i hapur’ që sot ne e kemi si nismë të tre vendeve që synojnë të përfshijnë të 6 vendet, është rezultat i këtij procesi. Nga ndërprevimi mund të ndërtojmë të ardhmen e përbashkët. Edhe konfliktet e trashëguara, në atmosferën e Berlinit kanë mundësi më shumë për zgjidhje. Këto gjëra i kam më të lehta t’i them kur nuk është zonja prezentë. Në historinë e rajonit Merkel ka vendosur një gur kilometrik për gjenerata të tëra. Natyrisht që është legjitime që për rajonin duan t’i bëjnë gjërat më shpejt. Jemi duke luftuar me një prapambetje që vjen shumë larg. Unë nuk e quaj dështim, por vizion afatgjatë, që do të kalojë nga një qeveri në tjetrën. Kancelarja vjen nga një e shkuar që është e ngjashme me tonën. S’e kemi pasur dhe s’do ta kemi për shumë kohë dikë në lidershimin e drejtimit europian që di se çfarë është komunizmi dhe ndrydhja e lirive të njerëzve, në vetë të parë. Kjo ka bërë që qasja, jo vetëm e kancelares, të jetë një qasje unikale. Uroj që kushedi që të marrë stafetën, të shoh rajonin,” tha Kryeministri Edi Rama duke marrë kthesën në përgjigjen për Procesin e Berlinit:

“Por sido që të shkojë, Rajoni e ka marrë kthesën me ‘Open Balkan’. Ne s’do presim që të na marrin prej dore, por do ecim përkrah.”

Pas kësaj kthese, Kancelarja Merkel u pyet nëse “Open Balkan” mund ta zëvendësojë “Procesin e Berlinit” por ndryshe nga Edi Rama ajo ishte e prerë:

“Procesi i Berlinit është bërthama e gjithçkaje dhe sigurisht në këtë kontekst nuk mund të zëvendësohet, gjërat mund të përshpejtohen brenda këtij procesi,” tha Merkel duke shtuar:

“Ballkani Perëndimor ka mësuar të bashkëpunojë vitet e fundit dhe të qëndrojë ulur. Ka shumë miq të Ballkanit Perëndimor. Macron e ka shëtitur të gjithë rajonin, kemi zhvilluar bashkërisht takime në Berlin sikundër kemi punuar së bashku në kuadër të proceseve të ndryshme. Kurz është një mik i rajonit dhe çdo kancelar tjetër do jetë mik i rajonit. Interesi për të bashkëpunuar me këtë rajon është vërtet i madh. Këtë e kemi treguar. Unë vij nga Gjermania Lindore dhe kam parë se çfarë force, energjie duhet për të kapërcyer pengesat historike. BP ka shumë miq në Europë dhe më lejoni t’ju siguroj për këtë.”

Në fund, para se të filloj takimet kokë më kokë me çdo Kryeministër, Kancelarja e Gjermanisë, Angela Merkel, kishte një urim për gjithë Ballkanin:

“Ju uroj mirëqenie, vende pune, paqe, të gjitha këto të ruhen në rajonin tuaj dhe ja vlen të bëhet kështu!”