Akuza, PD: Punësime elektorale! Gjykata: Prokuroria të nisë hetimet në Bashkinë Vau i Dejës!
Gjykata e Apelit të Shkodrës ka urdhëruar Prokurorinë të nisë hetimet për akuzat e ngritura nga Partia Demokratike mbi punësimet masive gjatë fushatës elektorale në territorin e Bashkisë Vau i Dejës.
Përfaqësuesi ligjor i PD, Marash Logu, në një prononcim për mediat ka zbardhur vendimin e Gjykatës së Apelit Shkodër:
“Ka prova konkrete që implikojnë administratën e Bashkisë Vau i Dejës në këto punësime masive për fushatën elektorale të 25 Prillit. Këto prova janë vetëm maja e ajsbergut e abuzimeve dhe masakrës elektorale që ka bërë partia në pushtet,” tha Logu duke shtuar se këto prova tashmë janë depozituar në organet e drejtësisë.
Ndryshe, Gjykata e Apelit ka detyruar Prokurorinë që të nisë hetimet dhe të thërrasë në organin e akuzës personat përgjegjës dhe Kryetarin e Bashkisë Vau i Dejës, Mark Babani, si autorë të punësimeve elektorale.
