Kërkesë në Parlament, PD: Komision Hetimor për zgjedhjet e 25 prillit!

Pas dorëzimit të kërkesës në Parlament për ngritjen e një Komisioni Hetimor për zgjedhjet e 25 prillit, Nënkryetari i Partisë Demokratike, Enkelejd Alibeaj, sqaroi se cilat janë çështjet me të cilat do të meret ky Komision:

“Kemi dorëzuar kërkesë si nevojë e aksionit politik, por edhe si nevojë ulëritëse që demokracia kërkon. Disa nga çështjet që duhen hetuar: Mbyllja e kufijve për emigrantëve, për të bërë të pamundur votimin e tyre. Mosbërja asgjë për procesin e legalizimit për 10 mijë objekte. Disbursimi i parakohshëm i ndihmës ekonomike. 4 vite u zhvatën, u vodhën, u varfëruan, ndërsa në periudhë zgjedhore 2.5 milionë euro ndihmë ekonomike, duke rifutur familjet në këmbim të votës. Punësimi i së paku 13 mijë shqiptarëve me kontrata të përkohshme, në periudhën e fushatës zgjedhore,” tha Enkelejd Alibeaj duke paralajmëruar “qershinë mbi tortë” të hetimit:

“Spiunazhi modern, 910 mijë shqiptarë të spiunuar prej procesit famëkeq të patronazhistëve.”

Ndryshe, Komisioni Hetimor për zgjedhjet e 25 Prillit është njëri nga tre Komisionet që Partia Demokratike do të kërkojë të ngriten e që kryetari i PD, Lulzim Basha, në mbledhjen e Grupti Parlamentar i ka konsideruar si prioritare. Në ditët në vijim pritet të dorëzohen kërkesat për Komisionin Hetimor për çështjen Becchetti dhe Komisionin Hetimor për inceneratorët.