Kurti: Tani fillon epoka kur Serbia nis e mësohet me reciprocitet

Pas arritjes së marrëveshjes në Bruksel në mes të Kosovës dhe Serbisë për çështjen e targave, ka reaguar Kryeministri i Albin Kurti, duke e konsideruar si fillimin e një epoke kur Serbia nis e mësohet me reciprocitet.

“Meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë pa dallim do t’iu mbulohet po ashtu simboli i tyre në territorin e shtetit tonë. Policia jonë kufitare në vijim do të zbatojë reciprocitetin e targave. KFOR-i do të qëndrojë aty, rreth dy javë, që gjithçka të jetë e sigurt,” ka sqaruar Albin Kurti marrëveshjen e Brukselit e cila i dha fund dhe bllokimit të rrugëve në veri dhe tensioneve me të cilat Presidenti i Serbisë, Alesandar Vuçiç, manipuloi opinionin ndërkombëtar meqë ai serb dhe shqiptar e kuptuan që në momentin e parë, bllofin e tij me helikopterë dhe avionë rus.

Reagimi:

Reciprociteti i targave të automjeteve është vendosur. Meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë pa dallim do t’iu mbulohet po ashtu simboli i tyre në territorin e shtetit tonë. Njësia Speciale e Policisë së Kosovës ka shkuar në Jarinje dhe Bërnjak më 20 shtator për të mbrojtur vendkalimet dhe policinë kufitare nga bllokuesit e rrugëve dhe qarkullimit të lirë. Meqë ata do të largohen, njësia jonë speciale nuk ka pse qëndron atje, dhe mbetet gjithnjë e gatshme për ndërhyrje në çfarëdo cenimi të njëjtë apo të ngjashëm në të ardhmen.

Natyrisht, policia jonë kufitare në vijim do të zbatojë reciprocitetin e targave. KFOR-i do të qëndrojë aty, rreth dy javë, që gjithçka të jetë e sigurt.

Në javën e shkuar, Presidenti i Serbisë vuri katër kushte për takimin në Bruksel të përfaqësuesve tanë. Natyrisht që nuk ju plotësuan ato dhe dje u zhvilluan bisedimet në Bruksel. Tash fillon epoka kur Serbia nis e mësohet me reciprocitet.