“Kriza energjetike”, Basha: Është krizë korrupsioni, në SPAK do sjellim kallëzimin brenda javës!
Pas mbarimit të mbledhjes së Grupit Parlamentar të Partisë Demokratike, Kryetari i PD, Lulzim Basha, tha se vendi nuk do të goditet nga një krizë energjetike, siç paralajmëroi kryeministri Edi Rama, por bëhet fjalë për një krizë korrupsioni për të cilën ai tha se këtë javë PD do të dorëzojë kallëzimin në SPAK.
“Të enjten do të zhvillohet seanca plenare e javës. Jo vetëm rendi i ditës, por edhe gjendja që ka pllakosur në vend janë tregues i qartë se kemi të bëjmë jo me një krizë energjetike por me një krizë korrupsioni. Ka nisur me vendimin që në verë të zbrazej kaskada e Drinit dhe të shitej me 1/3 e çmimit që do të blihet tani energjia, pasuria hidrike e Shqipërisë dhe shqiptarëve.
Që ta blejnë do iu duhet të marrin borxh, borxhin do e nxjerrin nga xhepat e shqiptarëve. Kjo është arsye pse është krizë korrupsioni. Në një vend normal, me institucione normale sot nga i pari i sektorit, përgjegjës politikisht tek drejtuesit famëkeq, nga Çela i Durrësit etj, do duhej të ishin të pandehur. Ndërkohë që presim që institucionet e drejtësisë të mos zdërhallen tapeteve të kuq të vanitetit në fundjavë, por të bëjnë detyrat e tyre, ne nuk mund të rrimë duarkryq. Për ne do të vazhdojë kjo javë me një ofensivë që do ketë në qendër interesin bazik të familjeve shqiptare, sepse kjo krizë korrupsioni po përkthehet në një krizë për familjet.”
Me këtë rast, kryetari i Partisë Demokratike ka përsëritur thirrjen e tij për SPAK dhe institucionet e drejtësisë për të çuar para përgjegjësisë ata që abuzojnë me pushtetin dhe vjedhin pasuritë e shqiptarëve.
“Si përfundim një thirrje edhe njëherë për institucionet e drejtësisë. Jeni para shumë testesh, por ky është një nga testet kryesore. Është e shkruar e zezë mbi të bardhë që kjo është një krizë korrupsioni dhe jo një krizë energjie. Faktet janë publike, ne do të sjellim kallëzimin në SPAK brenda kësaj jave, thjesht dhe vetëm për t’iu hequr çdo alibi atyre që kërkojnë alibi. Ata që paguhen me rroga të larta nga taksapaguesit shqiptarë, që iu paguhen fluturimet në Amerikë dhe në vende të tjera të Evropës për t’u trajnuar sipas praktikave bashkëkohore të FBI-së apo drejtësisë europiane apo amerikane; që mbajnë pas vetes eskorta të shtrenjta oficerësh të gardës; që iu paguhet celulari, nuk janë aty për asgjë tjetër, përveçse për të bërë detyrën e tyre para taksapaguesve shqiptarë,” tha Kryetari i Partisë Demokratike, Lulzim Basha, duke përfunduar:
“Ta kuptojnë në çdo minutë që janë të rrethuar nga komoditeti i zyrës dhe i favoreve të zyrës se ajo zyrë është krijuar për një funksion, për t’i dhënë fund pandëshkueshmërisë dhe për të çuar para drejtësisë zyrtarët e lartë që abuzojnë me pushtetin dhe që vjedhin pasuritë e shqiptarëve.”
