Shefi i OBSH-së: Pandemia është larg përfundimit!

Shefi i Organizatës Botërore të Shëndetësisë, OBSH, paralajmëroi se bota ka ende një rrugë të gjatë derisa të arrijë momenti kur mund të shpallet e përfunduar pandemia e COVID-19.

“Kemi pothuajse 50.000 vdekje në javë bazuar vetëm në shifrat e raportuara. Pandemia është larg përfundimit”, tha Drejtori i Përgjithshëm i OBSH-së, Tedros Adhanom Ghebreyesus në Samitin Botëror të Shëndetit në Berlin.

Sipas tij, raporton RFE, është në duart e njerëzimit për t’i dhënë fund pandemisë.

“Ne kemi të gjitha mjetet e shëndetit publik që na duhen, por bota nuk i ka përdorur mirë”, tha ai, duke shtuar se pandemia do të përfundojë atëherë kur bota do të zgjedhë t’i japë fund asaj ndërsa përsëriti sërish thirrjen për shpërndarje më të drejtë të vaksinave kundër COVID-19.

Tedros Adhanom Ghebreyesus tha se vendet që kanë arritur tashmë shkallën prej 40 për qind të vaksinimit, përfshirë gjitha vendet e G20-ës, duhet që t’iu lënë rradhën e furnizimit vendeve të varfra.

Ai shtoi se prodhuesit e vaksinave duhet të vendosin në përparësi dhe të përmbushin kontratat e tyre me programin botëror për shpërndarjen e vaksinave në vendet e varfra, COVAX, dhe furnizimin në vendet e Afrikës.

Ka kohë që OBSH-ja po u bënë thirrje prodhuesve të vaksinave që të heqin dorë nga pronësia intelektuale në mënyrë që më shumë vende të fillojnë prodhimin e vaksinave.

“Pengesa nuk është prodhimi, por politika dhe përfitimi”, tha Drejtori i Përgjithshëm i OBSH-së, Tedros Adhanom Ghebreyesus.

Ndryshe, pandemia u shpall në fillim të vitit 2020 dhe që nga ajo kohë, sipas të dhënave të Universitetit Johns Hopkins, në shkallë globale janë infektuar mbi 240 milionë njerëz. Prej tyre, rreth 5 milionë kanë vdekur.