Ndërhyn në interpelancë, Rama: Mbi ç’bazë ngrini akuza për babëzi e makutëri?

Ndonëse ishte një interpelancë e pakuptimtë për Zv/Kryeministrin Arben Ahmetaj e thirrur nga deputeti i PD, Feridinand Xhaferi, i cili ishte i prekur pse i kërkonte llogari një zyrtari për rindërtimin e zonave të goditura nga tërmeti, dhe njeriun më të akuzuar nga Partia Demokratike çdo 2 minuta e quante “i nderuar”, Kryeministri Edi Rama edhe në këtë kashtë gjeti gjilpërën.

Rrregullorja nuk e parashikon por kjo nuk e pengoi Edi Ramën që të ndërhyjë në interpelancë dhe arsyeja ishte madhore, pse njeriu që ka thënë se do të përmirësoj cilësinë e diellit akuzon mazhorancën se po bën makutëri me rindërtimin.

“Jam i detyruar të ndërhyj, sepse realisht dëgjova një uturi shpifjesh dhe akuzash, dhe bëtë edhe një gjest digjital këtu. Ju kujtoj se ka qenë pandemia dhe që kanë qenë muaj të tërë, në të cilët kantierët janë bllokuar dhe detyrimisht edhe afatet do të shtyheshin. Ajo që më shqetëson më shumë nuk është ky aspekt, por aspekti tjetër, mbi ç’bazë ju i ngrini këto akuza dhe flisni për babëzi e makutëri? Keni ndonjë shifër, ndonjë fakt? Shkollat kanë standarde, kritere, janë zhvilluar si proces ndërtimi me gara, garat kanë dosje, dhe mbi gjithë këto fakte mund të bëhen edhe hulumtime, investigime, e pastaj mund të nxirren konkluzione profesionale. Jo si mjek popullor apo si akrobat popullor cirku. Është shumë e shëmtuar që gjithë kjo përpjekje të përbaltet në këtë far feje pa asnjë lloj baze. Siç tha dhe Ahmetaj, shkollat janë aty, krah për krah me shkollat që keni ndërtuar ju dhe kontrasti është i njëjti, si kontrasti mes të sotmes dhe mesjetës, me thënë të drejtën. Natyrisht që në këtë aspekt nuk matemi me ju, se nuk mund të matet cilësia e diellit me errësirën, por pa diskutim që me shumë vëmendje do ta mirëprisnim çdo lloj fakti e argumenti, jo dokrra e të shara prej të dehuri në klub, por fakte dhe argumente. Zotrote thua se qenkan fshirë sheshet për të fshehur gjurmët. Cilat gjurmë?”

Dhe, kur u shkel Rregullorja nga Kryeministri kjo u vazhdua edhe me deputetin Xhaferaj i cili nga ulësa po i ndëhrynte shkelësit ë përjetshëm të ligjeve që shqiptarët e kanë për taskirat ta kenë për Kryeministër i cili rebelohet edhe për ndërhyrjen e depuputetit:

“Mos më ndërprit, unë nuk emëroj drejtorë. Të gjitha godinat e prishura kanë historikun e tyre dhe historiku i tyre është vlerësuar nga organet e kompetente. Ndryshimi mes nesh dhe jush është se juve sytë ju janë imunizuar prej shumë vitesh nga plehrat, nga shëmtia, nga deformimi, se ndryshe nuk do të ishit krenarë pa kthim për gjithë masakrën urbane, që keni lejuar dhe keni promovuar si një mrekulli të tetë të botës në Shqipëri. Nuk do të ishit krenarë. Në kohën kur ju qeverisnit, duhej dalë me duar në hundë e në sy për të mos parë e për të mos marrë erë. Kjo është karakteristika e qeverisjes suaj historikisht. Dhe këtu nuk kemi çfarë diskutojmë, se kemi konflikt estetik, është e kotë të flasim. Për ju janë të tepërta, janë kot, këto për të cilat flasim ne, e për të cilat investohemi ne. Unë po ju them që numri i familjeve, që sot gëzojnë shtëpinë, është i madh dhe do të rritet në javët e fundit të këtij muaji,” tha Kryeministri Edi Rama duke përfunduar:

“Ju ftoj personalisht juve z. Xhaferi, që të na bashkoheni në hapjen e dyerve të shtëpive e apartamenteve për mijëra familje, deri më 26 nëntor, që bëhen dy vjet nga tërmeti, dhe ku ju do shikoni me sytë tuaj se në Ishëm, psh, apo Thumanë, Fushë Krujë, Bubq, nëse s’përtoni mund të vini me ne dhe në Lezhë, Tiranën ja ku e kemi, ka shumë gjëra për të cilat mund të flisni e kritikoni, por për këtë çështjen e tërmetit mendoj se duhet t’i rrini larg shumë, se bëheni shumë qesharakë, kur flisni për një nga ndërmarrjet më të mëdha, që do të mbetet në histori.”