Drejtuesit janë aut, Edi Rama: Skanim shkollave, kush nuk e meriton…

Duke prezantuar buxhetin e vitit 2022 për Ministrinë e Arsimit, Kryeministri Edi Rama foli dhe për perspektivën e re të Arsimit ndërsa kritikoi atë që kultivoi vet, punësimin politik. Vendi i punës, tha ai duhet të meritohet dhe jo të fitohet sipas përkatësisë politike ndërsa vuri gisht edhe aty ku nga dita që erdhën komunistët në pushtet, asnjëri nuk do reformim të emërimit të drejtuesve të shkollave.

Edi Rama i gjeti të emëruar nga partia, i spostoi dhe i vuri partia e tij por sot ai thotë se ata duhet ta meritojnë atë vend dhe për këtë premtoi një skanim të plotë shkollave në mënyrë që emërohen ata që e meritojnë.

“Kemi vendosur një fond për sportin. Kemi futur edukimin fizik i cili ishte hequr fare. Do të shtohen klasat sportive të shkollës, në mënyre që të rinjtë të kenë një alternativë. Domosdoshmëria e një rritje cilësore të drejtimit të shkollës, ne kemi bërë shumë për mësuesit, për ti nxjerrë nga vorbulla e pasigurisë për shkak të politizimit, korrupsionit të bakshishit që e bënte profesionin të pasigurt. Pavarësisht rasteve të shpërdorimit në këtë sistem mund të thuhet që është përqindje e vogël,” tha Edi Rama dhe pas renditi gjithë suksese që kishte arritur ai me qeverisjen e tij, ngeci aty ku askush nuk arriti ta zgjidhë që nga viti 1945, drejtuesit e shkollave, që i emëroi dhe i emëron partia.

“Në raport me të shkuarën nuk kemi bërë shumë për drejtimin e shkollave. Kemi drejtuese shkollash që nuk e meritojnë të jenë aty. Kemi drejtues shkollash që janë aut dhe këtu është e qartë për mua, për ministren dhe duhet të jetë e qartë për Drejtorinë që duhet ndërhyrë, në mënyrë që drejtuesit me vlerë të mbështeten, ndërsa ata që nuk e meritojnë. Nuk ka rëndësi çfarë bindje politike ke , apo nga je. Nëse ne nuk kemi drejtimin e shkollës , apo ka një koordinimin nga lart brenda shkollës është e pamundur,” tha Kryeministria Rama duke folur sikur ata u emëruan para se ai të futej në këtë konferencë dhe më fund dha një lajm të mirë, pagat:

“Pika më e fortë e sistemit tonë para universitar janë mësuesit , në radhë të parë mësueset, burrat të më falin. Duke filluar nga mësueset duhet ti japim më shumë motivim, patjetër që do ti paguajmë çdo vit e më mirë.”