Miratohet Buxheti i vitit 2022
Me 77 vota për dhe 46 kundër Parlamenti i Shqipërisë miratoi sot në seancë plenare Buxhetin e vitit 2022.
Ndërkohë Parlamenti rrëzoi amendamentet e propozuar nga deputetët e opozitës madje oreks për rrëzim të amendamenteve treguan edhe në rastin kur u propozuan nga deputeti i PS, Erion Braçe i cili mori vetëm 10 vota, 5 abstenuan dhe 84 ishin kundër.
Por amendamentet tjera të deputetëve socialistë u votuan me lehtësi. Kështu me 87 vota për, 22 kundër dhe 2 abstenime u miratuan amendamentet e propozuara nga Kryetari i Grupit Parlamentar të PS-së, Taulant Balla.
Lajm i shumëpritur i kësaj seance është dhe miratimi i Projektligjit “Për ratifikimin e marrëveshjes ndërmjet Këshillit të Ministrave të Republikës së Shqipërisë dhe Qeverisë së Republikës së Maqedonisë së Veriut për ngritjen e pikave të përbashkëta të kalimit kufitar ndërmjet Republikës së Shqipërisë dhe Republikës së Maqedonisë së Veriut”, me 127 vota për, 0 kundër dhe 2 abstenim.
Si dhe miratimi i Projektvendimit “Për një shtesë në vendimin nr. 79/2021 “Për ngritjen e komisionit hetimor të Kuvendit “Për kontrollin e veprimtarisë së organeve të administratës publike dhe pushtetit vendor, për të verifikuar përdorimin e burimeve të administratës shtetërore për qëllime elektorale në zgjedhjet e 25 prillit 2021”, me 122 vota për, 0 kundër dhe 1 abstenim.
Ndryshe, Parlamenti i Shqipërisë miratoi dhe Projektligje të tjera në seancën e sotme plenare me 14 Pika të Rendit të Ditës.
