Dita e Rinisë, Berisha: Në 11 dhjetor do të rithemelohet PD!

Lideri historik i Partisë Demokratike, Sali Berisha, pas homazheve te shtatorja e Azem Hajdarit në Sheshin Demokracia në Qytetin Studenti i bëri thirrje delegatëve që kanë firmosur dhe ata që nuk kanë firmosur të vijnë në 11 Dhjetor në Kuvend ku do të rithemelohet PD.

Sot në Ditën e Rinisë, nga Sheshi Demokracia kishte dhe një mesazh të veçantë edhe Kryetari i FRPD dhe deputeti Belind Këlliçi, i cili duke ftuar delegatët për pjesëmarrje në Kuvend, tha se 11 Dhjetori do shënojë dhe Ditëlindjen e dytë të PD

Me këtë rast, Ish-Presidenti Sali Berisha akuzoi Edi Ramën se në këto 8 vite në lidhje me krimin, me nostalgjinë e modelit të etërve të tij bëri në mënyrë kriminale arritjet e mëdha ndërsa Lulzim Bashën e cilësoi si tradhtarin më të madh.

“Të dashur Fatmira dhe Azem dhe shumë anëtarë të grupit të dhjetorit ‘90”. I atyre ditëve në të cilat rinia studentore e udhëhequr nga prijësi i saj, nga djali zemër luan, Azem Hajdari, ndau historinë, ndau epokat e shkallmoi dyert e mbyllura të lirisë për Shqipërinë dhe shqiptarët. Sot në mblidhemi në këtë shesh ku edhe filloi revolucioni paqësor më i madh në historinë e kombit shqiptar. Revolucion paqësor i cili do të sillte vendosjen e pluralizmit politik në Shqipëri dhe përmbysjen e diktaturës së egër staliniste të Enver Hoxhës. Në këtë kontekst, ata që nisën këtë revolucion, Azem Hajdari që i priu me guxim të jashtëzakonshëm firmosën në historinë e kombit një nga faqet më të ndritura të lirisë së tij. Livizja studentore e dhjetorit 90, studentë të cilët njerëzit më të shtypur, më pesimistë do t’i quanin engjëjt e demokracisë, u përballën ato ditë me një betejë që të kujton dhe ngjason me atë të Davidit dhe Golias. Me vendosmërinë e tyre të hekurt, studentët të mbështetur nga pedagogë dhe qytetarë të Tiranës ia dolën të mposhtin diktaturën komuniste. Betejat e dhjetorit ishin beteja të pabarabarta. Në një anë studentët të armatosur vetëm me guximin e tyre dhe në anën tjetër tanket, gazi lotsjellës dhe terrori i policisë sekretë shqiptare. Por asgjë nuk mund të mposhtë përpjekjet e rinisë për liri dhe dinjitet njerëzor,” tha Sali Berisha duke shtuar se këtu nisi beteja e cila do të shndërrohej me shpejtësi në uragan .

“Më 22 mars u arrit që të përzënë me votën e lirë, regjimin më të egër. Miqtë e mi në 3 dekada, Shqipëria me gjithë kompleksitetin dhe vështirësisë shoi ndryshime në krye të PD, sa as në asnjë vend tjetër, në Europa dhe më gjerë. Nga vendi më i izoluar i Europës dhe planetit, ajo kaloi në grupin e vendeve me të ardhura të mesme dhe të larta. U anëtarësua në Këshillin e Europës, bëri hapa para për anëtarësim në BE. Pësoi transformime të gjithanshme. Në 2013 kaloi në opozitë, më pas erdhën ata që u përmbysën në 92. Edhe Edi Rama, i cili në nëntor të 90-ës sapo nisi lëvizja studentore ia mbathi në Korfuz dhe u kthye pasi përfundoi çdo gjë. Në këto 8 vite ai në lidhje me krimin, me nostalgjinë e modelit të etërve të tij bëri në mënyrë kriminale arritjet e mëdha. Koha ndaloi dhe bëri prapakthehu. në këto 8 vite, PD, demokratët derdhën lumenj djersë, sakrificat, por mjerisht ata kaluan nga një humbje në një humbje tjetër.

Absolutisht jo për shkak të tyre, por krejtësisht të njeriut i cili pas 8 vitesh meriton të quhet aspak dhe as më shumë Lulëzim Boshi, apo peng-kryetari. Në këto 8 vite shqiptarët u larguan nga Shqipëria si në vitin 91. Regjimi në pushtet priste shpresën, çdo sekondë e minutë te shqiptarët. Shqipëria një vend i bekuar me pasuritë e saj përrallore, me potenciale, me inteligjencën e njerëzve të saj, të mençur, u bë vendi i shpresës së munguar, i dëshpërimit dhe pesimizmit i qytetarëve të saj. U bë vendi ku kërkesën e tyre të madhe, alternativë e tyre ngeli largimi nga Shqipëria. Të gjitha këto erdhën se në 8 vite PD pushoi së qenuri ajo që ishte. drejtuesi i saj preu një nga një kolonat mbi të cilat ajo ishte ngritur, parimet dhe idealet mbi të cilat ajo qëndronte. Nëse sot themi se Rama është armiku më i egër i pluralizmit i demokracisë, Lulzim Basha është pa asnjë diskutim është tradhtari më i madh i tyre. Mirëpo, llogaritë e Edi Ramës se ka marrë peng Lulzim Bashës do të mund të marrë peng idealet e pavdekshme të dhjetorit, të studentëve liberatorë, të PD, të dhjetra qindra mijërave, anëtarëve të saj, të cilët shkrin të gjitha forcat dhe energjitë e tyre për një Shqipëri tjetër, kanë marrë fund. Sot vijmë në këtë dhjetor me një dhjetor të ri të idealeve më të larta më të vendosur se kurrë. Të rithemelojmë partinë e dhjetorit të 90, partinë e studentëve dhe të të rinjve, të shqiptarëve, të votës së lirë,” tha lideri historik i Partisë Demokratike duke siguruar se vijnë më të vendosur se kurrë, ashtu siç çmontuan dhe përmbysëm 31 vite më parë diktaturën hoxhiste, të përmbysin dhe çmontojnë narko-shtetin e Edvin Kristaq Ramës, dhe pengut të tij Lulzim Basha ndërsa përfundoj:

“Të rikthejmë vlerat e lirisë, votën e lirë, dinjitetin njerëzor, hapin e shpejtë të integrimit të vendit në BE. 11 dhjetori po vjen, është ditë e madhe e atyre që themeluan PD-në, e atyre që arritën që të përmbysin diktaturën komuniste, që ndërtuan Shqipërinë demokratike. E atyre që në një moment kritik për pluralizmin politik, u ngritën si feniski dhe do të ndërtojnë në 11 dhjetor monumentin madhështor të pluralizmit politik. Nga ky shesh, shesh i historisë së madhe, ftoj demokratët, delegatët e Kuvendit Kombëtar, ata që firmosën dhe ata që nuk firmosën, të vijnë në 11 dhjetor në Kuvend që do të mbahet në Arenën Air Albania.”

Kryetari i FRPD dhe deputeti i PD, Belind Këlliçi, duke falënderuar studentët që  morën pjesë në lëvizjen studentore para 30 viteve dhe studentët aktualë që ishin pjesëmarrës në këtë takim, tha se të rinjt e PD janë edhe themeli i Partisë Demokratike për të cilën tha se do ta ketë ditëlindjen e saj të dytë më 11 Dhjetor.

“Një nga tiparet që i ka munguar këto vite PD, kanë qenë takimet emocionale. Ky është takimi im i 6-të që unë kam marrë pjesë, por është ndër takimet me emocionuese dhe të bukura. Gjej rastin të falënderoj të gjithë ata studentë që sot jetojnë dhe punojnë, por që fatkeqësisht  nuk e realizuan dot idealin e Shqipërisë si e gjithë Europa. Falënderoj edhe studentet që janë këtu, sepse vijojnë të ndjekin të njëjtën ëndërr. Kjo prezencë tregon se PD po ringrihet, tha Këlliç i duke shtuar:

“11 dhjetori do shënojë ditëlindjen e dytë të PD. Ne kemi parë vetëm para pak ditësh foltoren e organizuar në SHBA, ku kishte te rinj që jetonin atje, por ju qante zemra për Shqipërinë dhe ende kishin shpresë për Shqipërinë si e gjithë Europa.”