Kuvendi, Voltana Ademi: PD do të ringrihet më e fortë për të rrëzuar regjimin!

Si në vitet 90, historia thërret në skenë sërish Partinë Demokratike, tha Kryetarja e Bashkisë Shkodër, Voltana Ademi, në Kuvendin e ligjshëm Kombëtar të PD duke shtuar se me besim tek njeri tjetri dhe shqiptarët vullnetmirë duhet të ringrihemi më të fortë për të rrëzuar regjimin ndërsa shprehu besimin se mund ta bëjmë të gjithë bashkë!

“Shqipëria në këto 31 vite ka bërë hapa përpara, por ndryshimet më të mëdha kanë ndodhur në vitet e qeverisjes ë PD-së. gjatë viteve të qeverisjes së PD, vendi ka pasur rritjen më të lartë ekonomike dhe më të konsoliduar ndër vendet e rajonit. Është një trashëgimi për të cilën ne në këtë vend dhe jashtë tij kemi arsye të ndihemi krenarë.

Këto tetë vitet e fundit kemi shënuar vetëm rekorde negative. Të rinjtë po braktisin vendin, PPP po grabisin paratë e shqiptarëve, jemi kthyer në epiqendër të trafikut të drogës, të gjitha pushtetet janë centralizuar në dorë dhe po rrëshqasim në një diktaturë me pamje të rrejshme,” tha Voltana Ademi por kjo situatë e rëndë duhet ndryshuar dhe do ta ndryshojmë të gjithë bashkë.

“Historia shpeshherë bëhet ciklike. Si në vitet 90, historia thërret në skenë sërish Partinë Demokratike. Në 31 mars 1991, komunistët fituan zgjedhjet e zhvilluara por më pak se një vit më pas, PD arriti të marrë mbi dy të tretat e votave të shqiptarëve duke e shkëputur vendin nga diktatura. Nuk kishte magji. Ishin të njëjtët shqiptarë që e çliruan me votë. Sot gjendeni thuajse në të njëjtën situatë. Qeverisemi nëpërmjet vjedhjes së votave nga nipër e bij të atyre që ishin pjesë e nomeklaturës. Duket e vështirë që kjo kastë të largohet, por në fakt ata janë të dobët të zhytur në korrupsionin e tyre dhe përvetësimin e pushteteve. Ne e kemi një armë që ia kemi provuar suksesin: bashkimin,” tha Kryetarja e Bashkisë Shkodër Voltana Ademi me besimin se PD do të ringrihet dhe regjim do të rrëzohet:

“Gjërat që na bashkojnë jo vetëm si demokratë e shqiptarë janë më shumë se ndasitë e momentit. Me besim tek njeri tjetri dhe shqiptarët vullnetmirë duhet të ringrihemi më të fortë për të rrëzuar regjimin. Partia Demokratike është më e rëndësishme se secili prej nesh, është familja jonë. Ne mund ta bëjmë të gjithë bashkë!”