Ragmi Mustafi: Nga viti 2008 janë njohur vetëm 30 diploma nga Kosova
Organizata LDA Balkan tashmë është shtrirë edhe në Luginën e Preshevës. Edhe pse shqiptarët e kësaj ane po ballafaqohen me diskriminim, kjo organizatë po synon ngritjen e potencialit dhe fuqizimin e tyre. Në organizimin e edicionit të katërt të projektit “LEAPin Prishtina 2021”, u tha se të rinjve të luginës nuk po u njihen diplomat e studimeve në Kosovë.
Ragmi Mustafi, i cili për vite të tëra ka qenë aktivist për të drejtat e banorëve të Luginës, thotë se rruga e tyre do të duhej të jetë si shqiptarët e trevave tjera. Derisa flet për vështirësitë e të mësuarit shqip, ai thekson se sot nxënësit e klasës së parë kanë abetaren.
“Djali im, Visari, i cili shkon në klasë të parë e ka abetaren. E që unë nuk e kisha atëherë,” tha Ragmi Mustafi.
Presheva, Medvegja e Bujanoci po vazhdojnë të diskriminohen tash e shumë dekada. Kryetari i Këshillit Kombëtar Shqiptar, Ragmi Mustafi tregon se përkundër iniciativave për sigurimin e teksteve shqip, ato ishin kthyer edhe në male.
Mustafi: Librat kanë ardhur me traktor malit, janë zënë dhe janë konfiskuar
“Nuk kishim libra. Libri ka qenë një nga faktorët që i ka munguar në vazhdimësi, po flas për librin shkollor. Ishin të ndaluara ato. Ka pasur disa iniciativa paraprake, kur në një moment për shkak të mungesës, njerëzit kanë pa mundësi të ndryshme për të sjellur aty. Kanë ardhur me traktor malit dhe janë zënë dhe janë konfiskuar,” shprehet Mustafi duke shtuar se nxënësit e Luginës me vjet të tëra kanë mësuar me libra të përkthyera jo mirë por vitin e ardhshëm edhe 19 komplete të teksteve mësimore do t’i sigurojnë për klasën e katërt dhe të tetë.
“Për herë të parë neve na ka ndodhur që ministri i Arsimit të Republikës së Serbisë të lejojë përdorimin e teksteve mësimore për klasën e parë, dytë, tretë, pestë, gjashtë, shtatë. Ndërkaq, të mbetur mangët për klasën e katërt, të tetë dhe për shkollën e mesme. Sepse në Serbi nuk ka studime para universitare, por që është e strukturuar me 4+4+4 dhe pastaj vijnë studimet universitare. Sot, përveç që kemi siguruar tekstet mësimore për këto klasë, kemi siguruar edhe tekstet e historisë për klasën e gjashtë dhe ne jemi në përpjekje për sigurimin e historisë për klasën e pestë, shtatë dhe tetë,” thekson Mustafi dhe megjithatë, Lugina e Preshevës vazhdon të jetë peng i marrëdhënieve politike mes Prishtinës dhe Beogradit ndërsa përfundon.
“Ashtu qysh i ka prekur me mos-njohjen e diplomave. Ne e kemi diku mbi 200 studentë që studiojnë në Republikën e Kosovës për çdo vit. Dhe nga viti 2008 janë të njohura vetëm 30 diploma, në anën tjetër diplomat e Serbisë në Kosovë janë njohur mbi 1800. Që është një disbalanc komplet.”
Ndryshe, LDA Balkan është e shtrirë në pesë vende të Ballkanit Perëndimor dhe në më shumë se 30 komuna të Kosovës, me qëllim të fuqizimit të të rinjve dhe rritjen e potencialit.
