Pas publikimit të listës së rrogave, Ministria e Financave: Ndërhyrje kriminale!

Pas publikimit të databazës me të dhënat e qytetarëve të punësuar në sektorin privat dhe publik, pozicionin e tyre të punës, numrin e ID-së, NIPT-it dhe pagës bruto të deklaruar të 637.138 tatimpaguesve, ka reaguar Ministria e Financave dhe Ekonomisë duke e cilësuar ndërhyrje kriminale në databazën e pagave të qytetarëve të Republikës së Shqipërisë për të cilë u tha se po përgatit denoncimin zyrtar për prokurorinë ndërsa kërkon dhe zbardhjen e rastit.

“Ministria e Financave dhe Ekonomisë ka ndjekur me shqetësim daljen e të dhënave mbi pagat e shtetasve shqiptarë. Analizat paraprake tregojnë qartësisht se nuk ka ndodhur asnjë eksport dixhital i databazës së pagave për periudhën janar – prill 2021 në fushat e dokumentit të hedhur në qarkullim.

Dokumenti ka një numër të ndryshëm nga personat e deklaruar dhe është bashkim i disa copave të ndryshme.

Po ashtu databaza dixhitale zyrtare e të dhënave të disponueshme nuk e përmban fushën “Emri i Plotë” siç lexohet në këtë dokument ilegal.

Agjencia Kombëtare e Shoqërisë së Informacionit ka mbyllur prej rreth një muaji termat e referencës për procedurën e hapur ndërkombëtare të auditimit për efekt të certifikimit me standardet ISO të sistemit informatik të Tatimeve, e cila shpallet zyrtarisht javët e ardhshme,” thekson Ministria e Financave dhe Ekonomisë në reagimin e saj duke përfunduar:

Ndërkohë Ministria e Financave dhe Ekonomisë po përgatit denoncimin zyrtar për prokurorinë, në kërkim të zbardhjes së kësaj ndërhyrjeje kriminale në databazën e pagave të qytetarëve të Republikës së Shqipërisë.”