Komanda e Operacioneve Speciale të SHBA për Evropën, Shtab në Shqipëri
Me qëllim të rritjes së aftësive të Forcave të Operacioneve Speciale për stabilitetin rajonal, Komanda e Operacioneve Speciale të SHBA për Evropën, SOCEUR, ka vendosur të ngrejë në Shqipëri një shtab të bazës të Forcave të Operacioneve Speciale, me rotacion.
“Aftësia për të lëvizur dhe trajnuar me shpejtësi brenda Ballkanit, në bashkëpunim të ngushtë me forcat e tjera aleate dhe partnere, e bëri Shqipërinë vendndodhjen më të mirë për këtë përpjekje,” u shpreh Komandanti i Komandës së Operacioneve Speciale në Europë, Gjeneral Major David H. Tabor, duke shtuar:
“Shqipëria mbetet një aleate e rëndësishme e NATO-s dhe një partnere e çmuar e sigurisë, si në nivel rajonal ashtu dhe global”.
Ndërkohë Ambasada e SHBA në Tiranë përmes një njoftimi thekson:
“Komanda e Operacioneve Speciale në Europë, SOCEUR, njoftoi se një shtab pararojë do të ngrihet në Shqipëri, me rotacion. Selia e re u bë e mundur falë mbështetjes së jashtëzakonshme të qeverisë shqiptare dhe Ministrisë së Mbrojtjes, si pjesë e përpjekjeve të vazhdueshme për rritjen e aftësive të Forcave të Operacioneve Speciale, si një gur themeli për stabilitetin rajonal,” thekson Ambasada e SHBA përmes një njoftimi në rrjetin social Facebook, vendim të cilin e përshëndeti edhe Kryeministri Edi Rama duke e cilësuar si shprehje të një besueshmërie shumë të lartë dhe një bashkëpunimi shumë të afërt.
Ndryshe, vendndodhja e selisë së SOCEUR në Shqipëri do të sigurojë ndërveprueshmëri më të madhe me aleatët tanë shqiptarë, qasje të rëndësishme në qendrat e transportit në Ballkan dhe fleksibilitet më të madh logjistik. Gjithashtu, kjo vendndodhje redukton në masë të madhe kohën e udhëtimit dhe rrit fleksibilitetin e operacioneve speciale dhe forcave konvencionale në rajon. Kjo nuk do të ishte e mundur pa mbështetjen e jashtëzakonshme të qeverisë shqiptare dhe profesionalizmin e ushtrisë shqiptare.
