Reshjet e borës, ARRSH: Mbyllet Rruga e Arbrit, ja gjendja në akset tjera…
Për shkak të reshjeve të borës dhe ngricave në rrugë, Rruga e Arbrit mbyllet sërish, ka bërë ditur Autoriteti Rrugor Shqiptar, ARRSH, duke garantuar se nuk ka probleme në akset tjera për qarkullim pasi borëpastrueset janë në terren ndërsa i bënëthirrje drejtuesve të mjeteve të kenë kujdes në lëvizje, të reduktojnë shpejtësinë, të pajisen me zinxhirë dhe goma dimërore, të respektojnë sinjalistikën rrugore dhe të ndjekin udhëzimet e Policisë Rrugore.
Raportohet se nga reshjet e rëna gjatë natës, në të gjithë qarkun e Dibrës, trashësia e borës ka arritur deri në 40 cm në zonat e thella malore ndërsa ARRSH thekson se Rruga e Arbrit do të jetë e mbyllur deri në një njoftim të dytë pasi kalimi në Bypasin e Murrizit bëhet tepër i rrezikshëm.
“Për shkak të reshjeve të dendura të dëborës gjatë gjithë natës dhe në vazhdim si dhe temperaturave shumë të ulëta, kalimi ne Bypasin e Murrizit bëhet tepër i rrezikshëm. Për këtë arsye Rruga e Arbrit do jetë e mbyllur deri në një komunikim të dyte,” thekson ARRSH ndërsa për segmentin Qafë Mali-Fushë Dukagjin vazhdon puna për pastrimin nga bora dhe shpërndarjen e kripës:
“Grupet e punës dhe mjetet borëpastruese janë në terren. Rruga është e kalueshme pa zinxhir.”
Ndërkohë Autoriteti Rrugor Shqiptar, ARRSH, duke njoftuar se gjatë natës ka pasur reshje shiu dhe dëbore edhe në Boboshticë-Dardhë, Qafë Thanë-Kapshticë, Fushë Stude-Klenjë, Bajram Curri-Valbonë, Kukës-Ura e Zapodit, Qafë Mali-Fierzë, Dedaj-Razëm-Bogë, Kuben-Vasije, Qafë Qelë-Pukë-Fushë Arrëz-Fushë Dukagjin, garanton se nuk ka probleme me qarkullimin ndërsa kontraktorët kanë punuar gjatë natës me mjete borëpastruese për pastrimin e rrugës dhe shpërndarjen e kripës por i bënë Apel drejtuesit e mjeteve:
“Gjatë orëve në vijim priten temperatura të ulëta deri në -17°C në zonat malore, duhet të bëjnë kujdes në lëvizje dhe të respektojnë sinjalistikën rrugore, të reduktojnë shpejtësinë, të pajisen me zinxhirë dhe goma dimërore,” thekson Autoriteti Rrugor Shqiptar, ARRSH, duke sugjeruar drejtuesit e mjeteve të ndjekin udhëzimet e Policisë Rrugore.
