Rritet çmimi i energjisë në Kosovë

Bordi i ZRRE-së miratoi rritjen e çmimit të energjisë për konsumatorët që tejkalojnë konsumin mbi 800 kilovat. Për ata që shpenzojnë rrymë më shumë se 800 kilovat, tarifa do të jetë 12 cent më e larta dhe 6 cent më e lira. Këto tarifa do të jenë në fuqi deri më 31 mars 2023.

Zyra e Rregullatorit të Energjisë (ZRRE) miratoi vendosjen e bllokut tarifor në 800 kWh, e jo në 600 sa kishte propozuar më herët.
Propozimi është bërë në mbledhjen e Departamentit të tarifave të martën dhe u miratua njëzëri.

“Ky bllok të zhvendoset në 800 kilovatë orë. Struktura e re tarifore deri në 800 kilovat i inkurajon konsumatorët që t’i shfrytëzojnë të dy tarifat. U ofron konsumatorëve që të shfrytëzojnë energjinë në mënyrë efikase me 5,9 cent kWh. Për ata që konsumojnë mbi 800 është tarifa e lartë prej 12 cent dhe tarifa e ulët 6 cent. Njëkohësisht edhe në deri 800 tarifa e ulët prej 3 cent dhe tarifa e lartë prej 7 cent”, është thënë nga Departamenti i tarifave në ZRRE.

ZRRE thekson se 20% e konsumatorëve e tejkalojnë këtë bllok të konsumit.
“Vendosja e bllok tarifave nuk është diskriminues. Disa nga komentet kanë qenë se a duhet të jetë rritje lineare. ZRRE-ja konstaton se pa një mbështetje nuk mund t’i arrijë synimet. ZRRE propozon që blloku të zhvendoset në 800 kWh, me dy tarifa prej 12.2 centë dhe 5.9 centë. Të gjithë konsumatorët komercialë dhe të amvisëritë, ZRRE-ja propozon që për 800kWh të ketë zero rritje”, është thënë nga Departamenti i Tarifave të ZRRE-së.
Dy tarifa do të mund t’i shfrytëzojnë edhe ata që konsumojnë më pak se 800 kWh. Tarifa e ulët do të jetë rreth 3 cent dhe tarifa e lartë 7 cent.
Në lidhje me shtrenjtimin e tarifave të energjisë, komente në ZRRE kanë dërguar Presidenca e Kosovës, Ministria e Financave, Ministria e Ekonomisë, Lëvizja Vetëvendosje, Lidhja Demokratike e Kosovës dhe Aleanca për Ardhmërinë e Kosovës.

Kujtojmë se ZRRE-ja në raportin e fundit konsultativ ka bërë shqyrtimin për ndryshimin e tarifave të energjisë elektrike në Kosovë, duke thënë se nuk ka nevojë për rritje të çmimit të rrymës për konsumatorët që shpenzojnë deri në 600kWh energji elektrike në muaj.
Në Kosovë ishte paralajmëruar rritja e çmimit të rrymës, pasi, siç ka thënë Qeveria, vendi po blen rrymë me çmime të larta dhe nuk po mund të plotësojë kërkesën me prodhimin e rrymës në termocentralet “Kosova A” dhe “Kosova B”.

Zyra e Rregullatorit të Energjisë (ZRRE) ka propozuar rritje të çmimeve të energjisë për amvisëritë për 9 për qind. Qeveria ka thënë se ka ndarë 75 milionë euro që të subvencionojë një pjesë të faturave të energjisë. Në propozimin e ZRRE-së për shtrenjtimin e rrymës, konsumatorët janë ndarë në pesë kategori: A, B, C, D, E. Nëse jeni në kategorinë A, pra nëse gjatë një muaji shpenzoni 300 kilovatë orë energji elektrike, atëherë çmimi aktual i faturës suaj është 18.87 euro. ZRRE-ja ka propozuar që kjo faturë të rritet në 20.40 euro. Por, me subvencionim nga Qeveria, fatura juaj do të mbetet e njëjtë: 18.87 euro.

Nëse jeni në kategorinë B, apo gjatë një muaji shpenzoni 450 kilovatë, atëherë çmimi aktual i faturës suaj është 27.37 euro. ZRRE-ja ka propozuar që kjo faturë të rritet në 29.66 euro. Por, me subvencionim nga Qeveria, fatura juaj do të mbetet e njëjtë: 27.37 euro./Monitor/