Dita Botërore e Lirisë së Shtypit, Yuri Kim mesazh me gazetarin e medias së sekuestruar nga Gjykata
Në Ditën Botërore të Lirisë së Shtypit, Ambasada e SHBA në Tiranë rithekson mbështetjen e palëkundur për gazetarët e pavarur ndërsa rikujton takimin e Ambasadores Yuri Kim me dy gazetarë shqiptarë, njëri prej të cilëve i Ora News që vazhdon të jetë e sekuestruar nga Gjykata e Posaçme kundër Krimit të Organizuar dhe Korrupsionit ndërsa pronari i saj i sanksionuar nga Departamenti i Thesarit!
Ndryshe, më 1 gusht Gjykata e Posaçme kundër Krimit të Organizuar dhe Korrupsionit vendosi sekuestron e 26 pasurive të Presidentit të “Yldon Media Group”, Ylli Ndroqi, mes tyre dy televizionet RTV Ora dhe Ora News. Më 27 gusht vendimi u la në fuqi në Apel por beteja vazhdon në Gjykatën e Lartë.
Ndërkohë më 11 Prill, Ambasada e SHBA në Tiranë ka bërë të ditur se Departamenti i Thesarit ka sanksionuar Ylli Ndroqin si individ i cili kërcënon stabilitetin e rajonit përmes korrupsionit, aktivitetit kriminal dhe sjelljeve të tjera destabilizuese.
Mesazhi
Në Ditën Botërore të Lirisë së Shtypit, Shtetet e Bashkuara ritheksojnë mbështetjen e tyre të palëkundur për gazetarët e pavarur të cilët përpiqen të zbulojnë dhe të përcjellin të vërtetën, të luajnë rolin e tyre mbikëqyrës në një mënyrë të përgjegjshme dhe të punojnë në një mjedis pa përndjekje, frikësime dhe vetëcensurë.
Javën e kaluar, Ambasadorja Yuri Kim u takua me gazetarët Edmond Hoxhaj (BIRN Albania) dhe Isa Myzyraj (Ora News) për të shprehur mbështetjen e palëkundur për gazetarët e pavarur dhe për të dënuar sulmet direkte dhe indirekte ndaj gazetarëve të cilët kërkojnë të raportojnë në mënyrë të pavarur dhe të saktë.
Sipas ambasadores, që lufta kundër korrupsionit të ketë sukses dhe pandëshkueshmëria të përfundojë, roli që ka një media e fortë dhe e pavarur është parësor.
