Sot “Ballkani i Hapur” ruso-serb në Ohër, ekonomia shqiptare në rrezik!
Ndonëse dje Ministri i Jashtëm i Rusisë, Sergej Lavrov, e pranoi se “Ballkani i Hapur” është projekt i Beogradit si një zhvillim i shpejtë i partneritetit strategjik Rusi-Serbi, kjo nuk e zbrapsi Kryeministrin e Shqipërisë Edi Rama, dhe atë të Maqedonisë së Veriut, Dimitar Kovaçevskit, që të jenë sot bashkë në Samitin e radhës në Ohër për realizuar synimet e Presidentit të Serbisë, Aleksandar Vuçiç.
Synime këto kriminale që nesër korrin dhe produktin e parë me këtë Samit, me firmosjen e marrëveshjes për heqjen e barrierave tarifore për disa nga produktet e eksportit dhe importit mes tri vendeve, ku më e humbura patjetër që do të jetë ekonomia shqiptare si e pakonkurrueshme me atë serbe, si për nga volumi ashtu dhe çmimi, pa parashikuar mekanizma mbrojtës të prezencës së mallit dhe shërbimit serb në tregun shqiptar.
Për të mbuluar këtë krim ekonomik dhe social, projekti serbo-rus “Ballkani i Hapur” bënë të ditur se do të nënshkruhen 4 marrëveshje si pjesë e bashkëpunimit 3 palësh ndër të cilat edhe ajo e “administratës tatimore”:
▪ Marrëveshja për bashkëpunim në Ballkanin Perëndimor në fushën e njohjes reciproke të diplomave dhe notave shkencore të lëshuara në institucionet e arsimit të lartë dhe të tjera institucionet e autorizuara
▪ Memorandum mirëkuptimi për bashkëpunim në fushën e turizmit në Ballkani Perëndimor
▪ Memorandum mirëkuptimi për bashkëpunimin kulturor në Ballkanin Perëndimor
▪ Memorandum mirëkuptimi për bashkëpunimin e administratave tatimore në Ballkanin Perëndimor.
Sot këtij projekti ruso-serb do ti bashkohet në rolin e vëzhguesit edhe Kryeministri i Malit të Zi, Dritan Abazoviç, pasi Mali i Zi ende nuk e ka marrë zyrtarisht vendimin për t’iu bashkuar “Ballkanit të Hapur”, ashtu si dhe Bosnje Hercegovina e cila sot përfaqësohet me Kryeministrin Zoran Tegeltija ndërsa Kryeministri i Kosovës, Albin Kurti, ka refuzuar pjesëmarrjen shumë kohë më parë.
Ndryshe, derisa Kryeministri i Shqipërisë, Edi Rama vazhdon të shprehet se kjo është iniciativë e tij, Presidentit të Serbisë, Aleksandar Vuçiç, dhe Ish-Kryeministrit të Maqedonisë së Veriut, Zoran Zaev, me qëllim të krijimit të një zone të lëvizjes së lirë të njerëzve, mallrave dhe shërbimeve në Ballkanin Perëndimor, Vuçiç e kishte pranuar kohë më parë se ideja ishte e tij, ndërsa Ministri i Jashtëm i Rusisë dje sqaroi edhe më në detaje se përveç se është projekt i Beogradit, “Ballkani i Hapur” si një zhvillim i shpejtë i partneritetit strategjik Rusi-Serbi, kundërshtohet nga BE dhe NATO.
Dhe jo vetëm kaq! Gjatë vizitës së Kryeministrit Edi Rama në Gjermani, kancelari Olaf Sholz i bëri të qartë se për Gjermaninë ekziston vetëm Procesi i Berlinit, për të cilin deklaroi se do ta rijetësojë.
