SHBA në linjë me BE, Escobar: Asociacioni, sipas Kushtetutës së Kosovës!

Pas takimit që Kryeministri i Kosovës, Albin Kurti, zhvilloi mbrëmjen e sotme me të dërguarin e Bashkimit Evropian për dialogun mes Kosovës dhe Serbisë, Mirosllav Lajçak dhe të dërguarin e Shteteve të Bashkuara për Ballkanin Perëndimor, Gabriel Escobar, ndërsa e cilësoi përgatitor para takimit të nesërm me Presidentin e Serbisë, Aleksandar Vuçiç në Bruksel, në kuadër të dialogut që ndërmjetëson BE, diplomati amerikan e tha qartë se dialogu është në duart e BE dhe ka mbështetjen e plotë të SHBA.

“Duhet të mbetet në duart e Evropës. E ardhmja e të dyja këtyre shteteve është në Evropë, kështu që Evropa po merr drejtimin, por e ka mbështetjen e plotë të Administratës amerikane. Duhet të shikojmë për zgjidhje që janë të pranueshme nga të dyja shtetet, që çojnë në normalizim dhe në stabilitet afatgjatë,” tha Escobar duke përsëritur se krijimi i Asociacionit të komunave me shumicë serbe duhet të bëhet sipas ligjeve e Kushtetutës së Kosovës.

“Çështja e Asociacionit është e rëndësishme. Është një përkushtim konsistent, ne mendojmë se duhet të implementohet brenda ligjeve dhe Kushtetutës së Kosovës,” Gabriel Escobar duke shtuar se për Asociacionin, SHBA është në linjë me BE-në.

“Absolutisht, ashtu duhet të jetë sipas ligjeve dhe Kushtetutës së Kosovës, por nuk do të thotë se duhet të jetë paragjykues për qytetarët serbë. Brenda BE-së ka shumë shembuj që mund të përdoren për të gjetur një zgjidhje stabile dhe produktive për të gjithë.”

Ndërsa Lajçak pas takimit tha se dëshiron që në takimin e 18 gushtit i cli pritet të filloj në orën 10:30, të ketë marrëveshje, dhe se përmes dialogut dëshiron që më 1 shtator të shmanget situata e tensionuar e 31 korrikut.

“Do të kemi diskutime për marrëdhëniet e së ardhmes, si të arrihet normalizimi dhe do të diskutojmë çështjet aktuale. Ne kemi dy liderë me mandate demokratike dhe presim që ata të dedikohen në gjetjen e një zgjidhjeje që siguron se nuk do të ketë krizë,” tha Mirosllav Lajçak dhe vetëm pak çaste më pas përmes rrjeti social Twiiter shprehet:

“Në prag të dialogut të nivelit të lartë në Bruksel, pata takime me kryeministrin e Kosovës Albin Kurti dhe presidentin e Serbisë Aleksandër Vuçiq, për t’u përgatitur për diskutimet e ditës së nesërme.”

Ndërkohë Albin Kurti pas takimit tha se se në takim me Lajçakun dhe Escobarin është diskutuar për elemente të kornizës për marrëveshjen për normalizimin e marrëdhënieve, që duhet të ketë në qendër njohjen reciproke, si dhe për çështjet aktuale.

“Pritet të trajtohen të gjitha marrëdhëniet bilaterale, me të gjitha vështirësitë dhe pengesat,” ndërsa sqaroi mediat se Kosova po diskuton për zgjidhje, jo për shtyrje sërish të zbatimit të vendimeve për targat dhe dokumentet serbe.

“Nuk është se e kemi bërë shtyrjen që të bëjmë edhe shtyrje tjera. Shtyrja është bërë më 31 korrik për datën 1 shtator, dhe me atë rast kemi dëshmuar – me datën 1 gusht – se nuk konfiskojmë dokumente, siç ka qenë fushata e dezinformimit. Në anën tjetër, është e mundshme që më 1 shtator nuk do të lëshojmë dokumente, sepse edhe Serbia do të heqë dorë prej lëshimit të dokumenteve në vendkalimet kufitare me Kosovën. Ne dëshirojmë marrëdhënie reciproke”.

Ndryshe, edhe Presidenti i Serbisë, Aleksandar Vuçiç ka zhvilluar takime me Lajçakun dhe Escobarin duke u shprehur më pas se ka rikonfirmuar vendosmërinë e Serbisë për të bërë gjithçka që të ruajë paqen dhe stabilitetin në gjithë rajonin, si dhe të arrijë zgjidhje kompromisi përmes dialogut, pa presion dhe ultimatume.