Mediat serbe: Friedrich Ebert Stiftung dhe EIP po hartojnë Statutin e Asociacionit

Fondacionit gjerman Friedrich Ebert Stiftung, FES, dhe Qendrës Evropiane për Paqe, EIP, i është besuar hartimi i Statutit të Asociacionit të Komunave me shumicë serbe. Kështu raportojnë sot mediat serbe ndonëse qytetarët shqiptar njohin angazhimin e të dërguarve special të Kancelarit Scholz dhe Presidentit Macron për zgjidhjen e stanjacionit në dialogun Kosovë-Serbi i cili drejtohet nga i dërguari i BE, Miroslav Lajçak.

Madje mediat serbe saktësojnë se FES dhe EIP kanë punuar në muajt e fundit në hartimin e këtij Statuti, dhe versioni i korrigjuar pas vërejtjeve të organizatave joqeveritare serbe e shqiptare nga Kosova, do të përfundojë në tryezën e të dërguarit të posaçëm të BE, Miroslav Lajçak, për dijalogun Kosovë-Serbi.

Dhe jo vetëm kaq! Mediat serbe, duke ju referuar burimeve diplomatike, raportojnë se të martën për këtë qëllim janë takuar në ambientet e “Aeroklub” në Beograd, përfaqësuesit e organizatave joqeveritare serbe dhe shqiptare nga Kosova, misioneve ndërkombëtare si dhe diplomatë gjermanë.

Me këtë rast, atyre u është prezantuar Drafti i Statutit të ardhshëm të Asociacionit të Komunave me shumicë serbe, ku kanë mundur të bëjnë vërejtje dhe propozime.

Ndryshe, derisa Prishtina zyrtare po e shmang debatin publik mbi zgjidhjen e çështjes së Asociacionit të komunave me shumicë serbe, Beogradi zyrtar duke akuzuar publikisht Prishtinën për obligimet e marra në Bruksel lidhur me këtë Asociacion, organizon edhe takime ndërkombëtare, duke propaganduar sikur është e interesuar për relaksimin e marrëdhënieve Kosovë-Serbi, ndërkohë Presidenti i Serbisë, Aleksandar Vuçiç, përdor grupet kriminale për të mbajtur nën tension lëvizjen e lirë të njerëzve dhe mallërave mbi Urën e lumit Ibër deri në kufirin verior të Kosovës!