S’ka lidhje me Ukrainën, Berisha: Rritja e çmimit të energjisë, vetëm vjedhje!

Rritja e çmimit të energjisë në vendin tonë nuk vjen si pasojë e luftës në Ukrainë, konstaton Kryetari i Partisë Demokratike, Sali Berisha, duke shtuar se kjo rritje është vetëm për të vjedhur, dhe, sipas tij kompanitë private që blejnë energji, e shesin më shtrenjtë dhe i ndajnë fitimet me qeverinë.

Duke folur para përfaqësuesve të sindikatave në Shqipëri, Kryetari i PD u zotua se me ardhjen në pushtet çmimi për biznesin do rikthehet në 6 lekë, aty ku ka qenë!

“Jam i gëzuar dhe ju falënderoj për praninë këtu. Në situatë  dramatike në të cilën ndodhet sot Shqipëria, ndodhet sot punonjësit mësuesit, mjekë minatorë, biznese të vogla, të rinjtë studentë, pensionistë, qytetarë me ndihmë ekonomike, është një situatë e pashoqe e pashembullt në Europë dhe më gjerë. Është një rrokullisje e madhe e gjendjes ekonomike dhe morale , në raport me dëshpërimin dhe pesimizmin, e mungesës së plotë të perspektivës me këtë qeveri që siç jeni dëshmitar, nuk është gjë tjetër, veçse një makineri gjigante mashtrimi.

Një makineri gjigante vjedhjeje dhe grabitje të qytetarëve shqiptarë. Një grabitje e pashembullt.  Ju jeni sindikalistë, por ju garantoj se nuk ka pasur regjim kolonial që të ketë shfrytëzuar një popull të kolonizuar siç shfrytëzon Edi Rama dhe qeveria e tij shqiptarët,” tha Sali Berisha duke shtuar se kriza energjetike ka vetë një shkak:

“Energjia elektrike miqtë e mi, kriza e saj ka vetëm një shkak, vjedhjen, vjedhjen dhe vetëm vjedhjen. S’ka asnjë lidhje me luftën në Ukrainë, asnjë lidhje me thatësirën apo me çmimin e naftës. Pasi 99% është ujore. Në 6 mujorin e parë Hecet private kanë prodhuar 54% të të gjithë energjisë së vendit. Çfarë do të thotë kjo? Do të thotë se prodhimi i energjisë në Shqipëri është mbidyfishuar falë kapaciteteve të reja private që kanë hyrë në prodhim.”

“Çfarë bëjnë këta? Merr dhe zbraz digën. E shet energjinë siç ka ndodhur në realitet me 40 euro megavati. Ky tregtari që e blen me 40 euro e shet këtë energji me 130 euro dhe ndan paratë me qeveritarët. Kjo është reale që ju them unë.

Kjo është reale. Ka një burse ku është çmimi, ku shitet dhe blihet energjia. Në një kohë kur në burse çmimi është 80 euro, KESH blen energji me 280 euro. Çfarë bëjnë këta? Këta ndajnë para me thes njëri me tjetrin. S’ka energji thotë Rama. Mashtrim, mashtrim, mashtrim!

E kemi shitur energjinë 6 lekë për biznesin, e kanë çuar në 200 e do e çojnë deri në 400. Asgjë më vrasëse për energjin nxjerrëse nuk ka më shumë se kjo. Ne vumë çmimin 6 lekë sepse edhe Gjermania kaq e kishte, edhe vende të tjera të zhvilluara,” tha Kryetari i Partisë Demokratike duke u zotuar me këtë rast:

“Ju garantoj se çmimi do rikthehet në 6 lekë aty ku ka qenë për biznesin. Një nga faktorët më tërheqës për investitorët e huaj në Shqipëri ishte çmimi i energjisë. Se diçka të veçantë duhet t’i ofrosh që të vijë.
Shqipëria nuk humbiste asnjë qindarkë sepse kostoja e prodhimit është 0.9 lekë mund të rritet nga tregtimi në OSSH por në prodhim është me saktësi 0.9 lekë dhjetëra herë më e ulët se sa e shet qeveria. ky mashtron dhe thotë se Gjermania e hoqi ujin e ngrohtë nga shkollat, i hoqi sepse i ngroh me gaz. Psikologji totalitare.”

Në takim me përfaqësuesit e sindikatave, Kryetari i Partisë Demokratike, Sali Berisha, u zotua dhe për statusin e minatorit, pagat në shëndetësi dhe arsim, si dhe statusin e artistit si një përparësi e madhe në këtë realitet do ketë trajtim të ri, i bindur se të gjitha janë të realizueshme ndërsa përfundoi:

“Kërkohet që ky sistem monist i bazuar në vjedhje e mashtrim të largohet një minutë e më parë. Grevat janë jetike. Sado i fortë të duket ky regjim i kalbur, është thjeshtë një kalbësirë që hiqet vetëm me protesta e greva që do ti ndërmarrim sa më parë.”