Berisha: Edi Rama i futi thikën Kosovës në Strasburg!

Kryetari i Partisë Demokratike, Sali Berisha, konferncën e përjavshme sot ia kushtoi fjalimit të Kryeministri Edi Rama në Asamblenë e Përgjithshme të Këshillit të Evropës, duke e vlerësuar se Rama i futi thikën Kosovës në Strasburg.

Përpjekjet e Edi Ramës për të ndryshuar Rezolutën e Dick Martyt në KiE për trafikun e organeve të qenieve njerëzore, Berisha i cilësoi si dëmtim të udhëheqjes politike të Kosovës në Hagë, dhe ai duhet frenuar.

Në fund, Kryetari i PD tha se Edi Rama foli në Strasburg për dy kombe shqiptare si ultranacionalist serb ndërsa i bëri thirrje KiE që të anëtarësojë Kosovën dhe të mos merret me retorikën e Ramës.

“Sot jam para jush për të denoncuar me forcën më të madhe, fjalimin antishqiptar të Edi Ramës në Strasburg, thikat pas shpine që ky armik i egër i kombit shqiptar, i futi kombit tonë, Kosovës dhe Shqipërisë. Edi Rama në Strasburg, me fjalën e tij, dyfishin e kohës së lejuar, të cilën sot, mund ta mbante vetëm Lukashenko i Bjellorusisë, me këtë qëndrim grotesk, detyroi Komitetin Presidencial të Asamblesë Parlamentare të Këshillit të Euroëps, dhe grupin më të madh të kësaj Asambleje, krahas mallkimeve, fyerjeve dhe sharjeve që lëshoi, të bojkotojnë zyrtarisht darkën, pavarësisht se ishte aty kryeministër i një vendi anëtar të Këshillit të Europës dhe NATO-s.

Ky akt nuk ka ndodhur kurrë në historinë 73-vjeçare të këtij institucioni. Por ndodhi për herë të parë me kryeministrin e të parit dhe të vetmit narko-shtet në Europë. Shqipëria dhe asnjë vend tjetër anëtar i këtij institucioni në 73 vite jetë, nuk ka njohur kurrë një turpërim të tillë.

Edi Rama shpalli në Strasburg aktin e madh të tradhtisë kombëtare, duke shpalosur aty tezën antikombëtare të kombit kosovar. Edi Rama e la Kosovën nën pushtimin serb dhe jugosllav, por nuk foli ndonjëherë për kombin kosovar. Beogradi promovoi me gjithë fuqinë e tij tezën e kombit kosovar dhe shqiptar. Me këtë tezë, Edi Rama jo vetëm miratoi ndarjen në dysh të kombit shqiptar, por indirekt edhe zhdukjen e kombit, pasi ai është kosovar. Kjo është thika më e rëndë që i futet kombit shqiptar. Ai futi thikën Kosovës, pasi dështoi me turp me tezën e luftës civile në Kosovë, në Strasburg i vlerësoi thjesht si një konflikt humanitar, ndërkohë që ai ishte një gjenocid me bazë racizmin e serbëve ndaj shqiptarëve,” tha Sali Berisha duke konstatuar se Edi Rama i futi thikën Kosovën në momentin më të papërshtatshëm.

“Pikërisht kur Kosova kishte nevojë për lobim pozitiv për anëtarësim në Këshillin e Europës, ai në sallën e këtij tempulli, lëshoi lumë sharjesh e akuzash të padëgjuara në gjithë ekzistencën e atij institucioni. I bëj thirrje KiE që të votojë Kosovën si anëtar të ri dhe të mos ndikohet nga retorika që është në mision kundër kombit të vet. Së fundmi, Edi Rama i futi thikë pas shpine Kosovës, pasi zgjodhi për mbrojtje mjetin më të dëmshëm, presionin e hapur politik ndaj gjykatës.

Reagimi i Edi Ramës zgjoi neveri dhe dënim në komunitetin ndërkombëtar, përfshi edhe te personalitete që kanë lobuar për të liruar udhëheqjen politike të Kosovës. Unë njerëzisht u bëj thirrje autoriteteve të Kosovës të ndalojnë fushatën politike të Ramës ndaj gjykatës së Hagës si mjet për të maskuar vasalitetin e tij ndaj Beogradit,” thekson Berisha në konferencën e përjavshme duke e cilësuar si një akt të një burracaku që kërkon të fshihet pas hijes së vet.

“Së pari, kam këtu tekstin e fjalës së përfaqësuesit të Edi Ramës në Asamblenë e KiE, ku thotë në mënyrë tekstuale se jemi dakord për hetim të plotë dhe të gjerë.

Së dyti, Edi Rama ka qenë kryetar i PS, kur deputetët e tij kanë votuar në parlament, ligjin për hetimin ndërkombëtar të këtyre krimeve në territorin e Shqipërisë.

Pra, Edi Rama ka qenë 100 përqind dakord me këtë. Unë shoh me një keqardhje disa qëndrime të autoriteteve të ndryshme në Kosovë, që nuk e frenojnë Edi Rama. Ai po dëmton gjendjen e udhëheqjes politike të burgosur në Hagë. Nëse presidenti i një vendi u arrestua pothuajse në avion, që nuk ka ndodhur krurë, në mënyrën më të pamerituar, kjo ndodhi për shkak të fushatës anti-gjykatë të Ramës dhe Baton Stanishiçit.

Absolutisht, qëndrimi më i keq që mund t’u bëhet zotërinjve Hashim Thaçi, Jakup Krasniqi e Rexhep Selimi, është fushata e çmendur e Edi Ramës, gjoja po i ndihmoj, por po i dëmton në palcë. Kjo me të gjitha, sidomos fjala e tij në Asamblenë Parlamentare. Është interpretuar si presion politik, gjë që e hedhin me neveri në Europën Perëndimore. Nëse do t’i ndihmojë, të caktojë një fond dhe të marrë avokatët më të mirë dhe t’i dërgojë në sallë. Por Edi Rama po përkeqëson gjendjen e tyre para trupit gjykues në Hagë. Unë në radhë të parë jam kosovar. Kurse Edi Rama po bën gjithçka për interesat e tij personale,” tha Kryetari i Partisë Demokratike, Sali Berisha, duke shtuar se Kosova ishte në prag të anëtarësimit, Edi Rama kishte disa mënyra më efiçente që të lobonte për këtë anëtarësim ndërsa përfundoi:

“Opozita nuk mund të humbasë kurrë fokusin si gardiane e interesit kombëtar. Edi Rama në Strasburg me retorikën e tij pseudopatriotike, shkelmoi interesin kombëtar, foli për dy kombe shqiptare si ultranacionalist serb. Bëri një bruto-figurë, që e detyroi Komitetin Presidencial dhe grupin më të madh parlamentar të bojkotojnë darkën sikur të ishte Lukashenko i Bjellorusisë.”