Për ata që duan ta kthejnë Shqipërinë pas, Yuri Kim: Unë ju them, ndalni!

Për ata që duan ta kthejnë Shqipërinë pas, Ambasadorja e SHBA në Tiranë, Yuri Kim, kishte mesazh të qartë me rastin e 30-vjetorit të themelimit të Gjykatës Kushtetuese: Ndalni! Ndërkohë nuk mungoi as mesazhi për prokurorët dhe gjyqtarët që kanë mbushur xhepat!

“Gjykata Kushtetuese është një gur themeli. Reformat e ndërmarra në 20016 ishin të rëndësishme. Gjykata Kushtetuese e ka zhvilluar punën mbi kriteret që aspirojnë për këtë gjykatë. SHBA është krenare. Që nga procesi i vettingut, deri te zgjedhja e anëtareve. Presim me padurim që gjykata të ketë gjykatës të kualifikuar. Nuk është e lehtë, por është duke bërë progres. Është duke dhënë rezultate. Ata që kundërshtojnë këtë progres, ata të cilët do të donin ta kthenin Shqipërinë në të shkuarën në kohën kur prokurorët dhe gjykatësit mund të kërcënoheshin, në një kohë kur qytetarët shqiptarë nuk besonin se ekzistonte drejtësia në gjykata, duhet të ndalojnë,” tha Ambasadorja e Shteteve të Bashkuara në Tiranë, Yuri Kim, duke e bërë të qartë se koha për të bërë dhurata dhe për të kërcënuar, ka përfunduar.

“Për ata që duan ta kthejnë Shqipërinë pas, kthejeni! Por kjo shkakton vuajtje për njerëzit. Unë ju them; ndalni! Koha për të bërë telefonata, për të dërguar emisarë, dhurata, kërcënime, duke kërcënuar për të ekspozuar sekrete të errëta nga një e shkuar, për të premtuar dhurata, formojnë baza për një sekret tjetër të errët. Kjo kohë ka përfunduar. Keni mbushur xhepat, tuaj dhe të të fëmijëve tuaj. Ndaloni!” tha kryediplomatja amerikane në Tiranë duke këshilluar shqiptarët të besojnë se ekziston drejtësia në Shqipëri:

“Qytetarët shqiptarë duhet të besojnë se ekziston drejtësia në Shqipëri, se ka një të ardhme më të ndritur. Ka dënim për ata që kryejnë krime, të gjithë janë të barabartë para ligjit. Këtë duhet të bëjë çdo gjykatë, çdo prokuror duhet ta bëjë. Ndaloni që të keni frikë nga këto kërcënime. Bëni punën tuaj. Lejoni që qytetarët shqiptarë të besojnë.”