Video/ Rrjedha e ujit mori automjetin, gjenden dy trupat e pajetë në Malësi të Madhe

Pas 16 orësh kërkime, janë gjetur dy trupat e pajetë, të babë e bir, në Malësinë e Madhe, pasi makina me të cilën udhëtonin e mori para rrjedha e përroit në Bogë.

Fjala është për shtetasin Pjetër Rushaj, 48 vjeç, dhe të birin Jason Rushaj, 13 vjeç ndërkohë falë dhe ndërhyrjes së një banori të zonës kur rrjedha e ujit mesditën e djeshme mori përpara makinën, fatmirësisht u arrit të shpëtohej vajza e familjes.

Njoftimi i Policisë

Në vijim të informacion të dhënë mesditën e djeshme se në vendin e quajtur “Grykë Lugje”, në njësinë administrative Shkrel, Malësi e Madhe, rrjedha e ujit të përroit kishte marrë përpara një automjet me të cilin udhëtonin tre persona, banorë të zonës. (babai, djali dhe vajza), ju bëjmë me dije se:

Pas 16 orë kërkimesh intensive, gjatë pasdites së djeshme, gjatë natës dhe gjatë mëngjesit të sotëm, nga polumbarët e RENEA-s, grupi i evakuim-shpëtimit, grupi alpin i FNSH Shkodër, emergjencat civile dhe shërbimet e Komisariatit të Policisë Malësi e Madhe, në gjatësinë e përroit, në Bogë, u bë e mundur gjetja e dy trupave (babë e bir).