Pas takimeve në Prishtinë dhe Beograd, Lajçak: Kosova pranoi propozimin evropian, vazhdojmë…

Përfaqësuesi i Posaçëm i Bashkimit Evropian për dialogun Kosovë-Serbi, Miroslav Lajçak, pas vizitave të djeshme në Prishtinë dhe Beograd është shprehur i kënaqur që Kosova ka pranuar në parim propozimin e BE për normalizimin e marrëdhënieve me Serbinë.

“Udhëtova për në Prishtinë për të takuar kryeministrin Albin Kurti dhe zëvendëskryeministrin Besnik Bislimi dhe në Beogradit të bëjë të njëjtën gjë me presidentin serb, Aleksandar Vuçiç dhe Petar Petkoviç. Më vjen mirë që edhe Kosova tani e pranoi në parim propozimin evropian,” shprehet sot Miroslav Laçak përmes rrjetit social Twiter duke përfunduar:

“Ne do të vazhdojmë diskutimet tona në një takim të nivelit të lartë!”

Ndryshe, një ditë më parë, kryeministri Albin Kurti tha se e pranon propozimin e Bashkimit Evropian për normalizimin e marrëdhënieve ndërmjet Kosovës dhe Serbisë, duke e konsideruar atë si një bazë të mirë për diskutime të mëtejshme dhe një platformë solide për të ecur përpara.

Ndërsa Lajçak tha pas takimit me Kurtin se kanë diskutuar gjithçka që lidhet me dialogun, por se diskutimi ka qenë i përqendruar te propozimi evropian. Ai përsëriti qëndrimin se të gjitha marrëveshjet e nënshkruara mes Kosovës dhe Serbisë duhet të zbatohen.

Propozimi i BE-së për normalizimin e marrëdhënieve Kosovë-Serbi u është dorëzuar dy vendeve në fund të verës së vitit të kaluar, ndërsa përmbajtja substanciale e këtij plani është njohja defakto e dy shteteve, duke respektuar integritetit territorial të dy vendeve dhe njohjen e simboleve shtetërore.

Propozimi i Bashkimit Evropian, që në fillim njihej si plani franko-gjerman, ka marrë mbështetjen edhe të Shteteve të Bashkuara.