S’lejon Asociacionin e komunave shqiptare, Berisha: Vuçiç, ultranacionalist i verbër serb!
Duke e vlerësuar të papërgjegjshme deklaratën e Presidentit të Serbisë, Aleksandar Vuçiç. ndërsa kundërshtoi kërkesën e shqiptarëve në Luginën e Preshevës për Asociacion të Komunave me shumicë shqiptare, Kryetari i Partisë Demokratike, Sali Berisha, e cilësoi Vuçiçin si një ultranacionalist të verbër serb.
“Vuçiç është një ultranacionalist i verbër serb, që nuk respekton asnjë parim të Kushtetutës së vendit të tij, të Konventës Europiane të të Drejtave të Njeriut.
Në një deklaratë të papërgjegjshme, kërkesës së shqiptarëve në Serbi, për një asociacion të komunave shqiptare, iu është përgjigjur me një deklaratë që do ta kishte lakmi edhe Gebëlsi po të ishte gjallë.
Ai, të drejtën e qytetarëve të lirë kudo në Europë, për të pasur në përputhje me Kushtetutën e vendit të tyre, e quajti marrëzi,” tha Sali Berisha duke shtuar se marrëzi nuk mund të jetë kurrë e drejta e qytetarëve për asociacion. Nuk mund të pretendosh kurrë për një standard për bashkëkombasit e tu, të cilin nuk ua njeh qytetarëve të etnive të tjera.
“Të gjithë pakicat mund të kenë shoqatat e tyre në përputhje me Kushtetutën, por Vuçiç e quan marrëzi këtë sepse përdor metodat më të dënueshme spastrimit në Medvegjë, Bujanoc dhe Preshevë.
Përdor metodat e çregjistrimit të detyruar, sa herë që postieri u troket në derë dhe nuk gjen njeri për të marrë lekët, paçka se i zoti i shtëpisë u vjen në dyqan duke bërë pazare. I çregjistron nga Gjendja Civile në mënyrën më absurde,” tha Kryetari i PD, Sali Berisha, duke shtuar se regjistri më i fundit dëshmoi se në këto komuna u regjistruan 130 mijë ndërsa përfundoi:
“Po të mos kishte manipuluar në mënyrë të paskrupullt dhe po të mos kishte ndjekur politika të qarta të spastrimit etnik të shqiptarëve, ky numër sot do të shkonte 170 deri në 200 mijë.”
Ndryshe, Presidenti i Serbisë, Aleksandar Vuçiç, e quajti marrëzi, duke kundërshtuar kërkesën e shqiptarëve në Luginën e Preshevës, për një Asociacion të komunave me shumicë shqiptare.
