Sot në Gjykatën Speciale fjalën e ka mbrojtja e Thaçit, Veselit, Krasniqit e Selimit

Sot në Hagë fjalën e ka mbrojtja e të akuzuarve, Hashim Thaçi, Kadri Veseli, Jakup Krasniqi dhe Rexhep Selimi, kundër akuzave të Zyrës së Prokurorit të Specializuar.

Dje, në ditën e parë u prezantuan pikat e aktakuzës ndaj ish drejtuesve të UÇK-së, ku prokurorët e specializuar me argumentat e tyre theksuan se katër të akuzuarit kishin themeluar dhe udhëhiqnin një ndërmarrje të përbashkët kriminale që thuhej se kishte për shënjestër kundërshtarët, përfshirë këtu ata që i konsideronte tradhtarë, kolaboracionistë e mbështetës dhe anëtarë të Lidhjes Demokratike të Kosovës. Këto veprime, sipas prokurorisë, ishin një luftës speciale kundër personave që i konsideronin tradhtarë dhe kolaboracionistë.

Në rastin ndaj ish-krerëve të UÇK-së, Prokuroria Speciale tha se ka 312 dëshmitarë, por jo domosdo të gjithë do të ftohen që të japin dëshminë para gjykatës. Mbrojtja po ashtu do të paraqesë dëshmitarët e saj, përfshirë disa dëshmitarë ndërkombëtarë.

Bazuar në kalendarin e Dhomave të Specializuara, seancat në rastin “Thaçi e të tjerët” do të vazhdojnë edhe me 5 prill, pastaj me 11, 12, 13 dhe 17, 18, 19 e 20 prill.  

Ndryshe, aktakuza ndaj katër ish-krerëve të UÇK-së ishte konfirmuar më 26 tetor 2020, por u bë publike një muaj më vonë. Pas njoftimit për konfirmimin e aktakuzës, Selimi dhe Krasniqi u arrestuan më 4 nëntor 2020, ndërkaq një ditë më vonë u arrestuan edhe Veseli e Thaçi. Që atëherë, ata gjenden në qendrën e paraburgimit në Hagë.

Të katër ish-krerët e Ushtrisë Çlirimtare të Kosovës, janë deklaruar të pafajshëm.

Gjykata Speciale në Hagë heton krimet e pretenduara të pjesëtarëve të UÇK-së, të kryera ndaj pakicave etnike dhe rivalëve politikë nga janari i vitit 1998 deri në dhjetor të vitit 2000.

Kjo Gjykatë është themeluar me votimin në Parlamentin e Kosovës më 2015, pas Raportit të senatorit zviceran, Dick Marty, në Këshillin e Evropës.

Për këtë Rezolutë nga viti 2011 në Këshillin e Evropës, Shqipëria ka inicuar një mocion në Asamblenë e Përgjithshme të KiE, ku thuhet se pa asnjë fakt u ngritën akuzat e tmerrshme ndaj Ushtrisë së lavidhsme Çlirimtare të Kosovës për trafikun e organeve njerëzore