LDK lëshon seancën, mazhoranca e quan të turpshme
Parlamenti i Kosovës po vazhdon edhe sot me seancën plenare, ku deputetët e Lidhjes Demokratike të Kosovës kanë lëshuar sallën me arsyetimin se koalicioni duhet të ketë 61 deputet. Kjo u cilësuar nga mazhoranca si turp, duke thënë se ata ishin vetëm shtatë deputetë, raporton KTV.
Derisa pritej të bëhet shqyrtimi i parë i Projektligjit për kompetencat e zgjeruara për konfiskimin e pasurisë, deputeti i LDK-së, Armend Zemaj dha një ultimatum për pozitën.
“Nuk mund të vazhdojmë pa miratuar rendi i ditës. Grupi parlamentar i LDK-së, nëse nuk arrini t’i keni 61 deputetë prezentë të koalicionit, do të presë 30 minuta, bëjeni kuorumin dhe do të marrim pjesë në vazhdimin e seancës”, tha ai.
Më pas deputetët e LDK-së lëshuan seancën.
Kurse, shefi i grupit të PDK-së, Memli Krasniqi, tha se kjo që po bën LDK është denigrimi i radhës që ata e bëjnë në Kuvendin e Kosovës.
“Janë shtatë deputet prej 27, se thirren në ata 27 sikur të ishin 120. Shtatë deputetë i kanë në sallë, të shtatit e kanë nënshkruar listën e prezencës për ta marrë mëditjen. Vinë këtu, rrinë dy minuta dhe bëjnë hajgare duke shantazhuar, silleni si të ishin 61 deputetë. Le ta dinë qytetarët e Kosovës se kjo është tepër, prej 27 kanë qenë 7, dhe ata vinë këtu për të bërë shantazhe dhe kushte “, tha ai.
Edhe Ahmet Isufi, në emër të AAK-së, tha se largimi i deputetëve të LDK-së është një gjest i turpshëm.
“Nuk ka nevojë të bëjnë vlerësime të tilla çfarë ishte fjala e Grupit parlamentar të LDK-së, por as 7 deputetë të saj nuk ishin në sallë. Kjo qëllimisht është bërë për ta bllokuar Kuvendin “, tha ai.
Shefi i Grupit parlamentar të Lëvizjes Vetëvendosje, Glauk Konjufca, tha se bojkoti i Kuvendit është strategji shumë legjitime.
“Për opozitën në përgjithësi do të ishte shumë më e kujdesshme një koordinim, qoftë edhe kur e bojkotojmë seancën në mënyrë që ta ketë efektin e vet”, tha Konjufca.
Ndërsa, deputeti i PDK-së, Hajdar Beqa, i tha Glauk Konjufcës se le ta kontrollojë edhe kryetarin e Vetëvendosjes, Albin Kurtin.
“Me analizu edhe kryetarin tënd a po ka kohë për të qëndruar këtu, apo veç po vjen me nënshkrue këtu si sot, me marrë mëditjen dhe me shkue në shtëpi“, tha ai.
Sërish ka reaguar Konjufca, duke i thënë Beqës se ai është shërbëtor në Kuvend.
“Është një mentalitet interesant këtu edhe prej zyrtarëve të Qeverisë edhe prej shërbëtorëve, siç është Hajdar Beqaj këtu“, tha ai.
Enver Hoti nga Nisma Socialdemokrate, tha se ky është një shembull që deputetët e pozitës duhet të jenë më të përgjegjshëm për të marrë pjesë në seanca, por gjithashtu edhe opozita, sidomos LDK-ja po del jashtë rrugëtimit të vet, pasi sot kishte edhe projektligje që kanë të bëjnë me integrimet evropiane.
