Gjykata serbe: Paraburgim 30 ditë për policët e rrëmbyer, MPJ: Po mbahen në kushte çnjerëzore

Gjykata e Lartë në Kralevë të Serbisë ua ka caktuar masën e paraburgimit prej 30 ditësh tre zyrtarëve policorë të Kosovës të cilët u rrëmbyen dy ditë më parë brenda territorit të Kosovës. Pas këtij vendimi ka reaguar Ministria e Jashtme e Kosovës duke theksuar se policët po mbahen në kushte çnjerëzore.

Në Gjykatën serbe ku iu shqiptua masa e paraburgimit prej 30 ditëve, Prokuroria e Lartë Publike në Kralevë tha se tre zyrtarët policorë të Kosovës dyshohen për veprat penale të prodhimit, posedimit, mbajtjes dhe trafikimit të paligjshëm të armëve dhe lëndëve shpërthyese.

Ministria e Jashtme e Kosovës ka njoftuar se policët po mbahen në kushte çnjerëzore, pa ushqim dhe pa trajtim adekuat mjekësor.

Sipas avokatit nga Serbia, Çedomir Stojkoviç, për këto vepra penale mund të shqiptohen dënime nga 6 muaj deri në 12 vjet burgim.

 “Duhet të dihet se Presidenti i Serbisë, Aleksandar Vuçiç, në bazë të nenit 110 të Kodit Penal, në çdo kohë mund t’i falë tre policë të Kosovës dhe t’i lirojë menjëherë. Por duhet ditur edhe se gjykata në Kralevë sigurisht që nuk i ka ndaluar ata pa një direktivë të tillë nga zyra e Aleksandër Vuçiçit,” tha Çedomir Stojkoviç , avokat nga Serbia.

Ndërkohë Ministrja e Drejtësisë, Albulena Haxhiu, ka bërë thirrje që policët të kthehen në Kosovë.

 “Demokracia nuk mund të ketë aleat autokracinë dhe as nuk mund të thellohet deri në absurd, të rrijë e heshtur ndaj autokratëve. Policët e Kosovës duhet të lirohen sa më parë”, ka thënë Haxhiu.

Ndryshe, tre zyrtarët e Policisë së Kosovës janë rrëmbyer më 14 qershor gjatë kohës sa po patrullonin në vendin e quajtur Tresave/Bare, në vijën kufitare Kosovë-Serbi.