Albin Kurti: Reforma në drejtësi është domosdoshmëri!
Drejtësia jonë vazhdon të jetë jo efikase dhe e ngadaltë, tha Kryeministri i Kosovës, Albin Kurti, në mbledhjen e sotme të qeverisë ndërsa foli për personat me vepra kriminale që lihen të lirë.
Nuk mungojnë edhe rastet më ekstreme tash të njohura edhe për publikun nga dënimi me burgim të përjetshtëm e që instanca e fundit e drejtësisë, Gjykata e Apelit i ka liruar, tha Kurti ndërsa theksoi dënimin e Dardan Krivaqës, i cili privoi nga jeta Marigona Osmanin, për të cilin u desht një shoqëri e një popull i tërë të reagojë që të dënohet ky krim.
Për besimin në institucionet e drejtësisë, Kryeministri theksoi se niveli i besimit i qytetarëve vazhdon të jetë ndër më të ultit në krahasim me institucionet tjera. Për këtë arsye, reforma është domosdoshmëri e Vetingu është zgjidhje, tha Albin Kurti duke falënderuar deputetët evropian për letrën drejtuar SHBA-së e BE-së, të cilët kanë bërë thirrje për një qasje më të ashpër ndaj Serbisë.
Ndërkohë, Qeveria e Kosovës në mesin e 12 pikave të rendin të ditës, pritet të miratoj Projekt-udhëzimin Administrativ për masat e duhura parandaluese dhe mbrojtëse për ndalimin e pjesëmarrjes së fëmijëve në klubet e natës dhe hapësira të tjera të ngjashme.
Ndryshe, Kryeministri i Kosovës, Albin Kurti, sot e ka nisur mbledhjen e qeverisë duke i uruar mirëseardhje ministrit të ri të Mbrojtjes, Ejup Maqedonci.
