Sezoni turistik, 5 polici patrullojnë në bregdetin shqiptar

Policia shqiptare do të patrullojë këtë sezon turistik me pesë polici të tjera të rajonit: italiane, kosovare, malazeze, kroate dhe maqedonase.

Për herë të parë u firmos marrëveshja për patrullime të përbashkëta mes Policisë së Shtetit dhe asaj italiane në kuadër të sezonit turistik. Do të jenë 6 punonjës të Policisë italiane që do të patrullojnë me policinë shqiptare në Durrës, Vlorë dhe Sarandë, ku numri i turistëve italianë është më i lartë.

Drejtori i Policisë së Shtetit Ardi Veliu deklaroi se këto iniciativa do t’i vijnë në ndihmë pushuesve italianë që kanë zgjedhur të kalojnë pushimet në vendin tonë.

Në kuadër të masave për rritjen e sigurisë gjatë sezonit, Policia e Shtetit ka marrëveshje edhe me Policinë e Kosovës, Malit të Zi, Kroacisë e Maqedonisë.