Tiranë, Presidentja Vjosa Osmani: Kombi shqiptar, faktor stabiliteti në rajon!

E bindur se situata në veri nuk është situata ajo që ka acaruar dialogun ndërmjet Kosovës dhe Serbisë, Presidentja e Kosovës, Vjosa Osmani, tha në Tiranë se kombi shqiptar faktor stabiliteti në rajon.

“Është Serbia ajo që gjithnjë acaron situatën në rajonin tonë nëpërmjet sulmeve të njëpasnjëshme ndaj Kosovës. Nuk ka javë që kalon që dikush nga Serbia nuk gjuan me armë policët e Kosovës që janë në territorin e Republikës Kosovës,” tha Vjosa Osmani pas takimi me Presidentin e Republikës, Bajram Begaj në Tiranë.

Tek Shqipëria, tha Presidentja Vjosa Osmani sheh mbështetjen e palëkundur për Kosovën duke përsëritur se Shqipëria ka mbështetur Kosovën në momentet të vështira, por dhe në procesion e shtetformimit dhe shtetndërtimit.

“Kosova dhe Shqipëria kanë një lidhje unike, historike, kulturore e kombëtare që e bën bashkëpunimin dhe lidhjen tonë të fortë e të pathyeshme. Përballë sfidave ne qëndrojmë të bashkuar duke u bashkuar në një qëllim: stabiliteti, prosperiteti dhe integrimi euroatlantik i vendeve tona.”

Kombi shqiptar, tha Presidentja e Kosovës, gjithmonë ka qenë dhe vazhdon të mbetet faktor stabiliteti në rajon, me orientim të qartë euroatlantik.

“Kosova nuk njihet nga të gjitha shtetet ndërkombëtarisht, ndaj presidentja Osmani theksoi nevojën për mbështetjen nga Shqipëria, për të qenë zëri i saj në instancat ku Kosova ende nuk përfaqësohet. Synim shtetëror e strategjik yni mbetet anëtarësimi në NATO dhe në BE, si dhe në të gjitha organizatat e tjera ku kemi interes shtetëror.

Fuqizimi i koordinimit të vazhdueshëm në politikën e jashtme është në dobi jo vetëm të shteteve tona, por edhe të rajonit më gjerë. Prandaj edhe kryefjala e vizitës sime është bashkërendimi për një strategji dhe veprim të unifikuar të politikës së jashtme,”tha Vjosa Osmani duke shtuar se ato synojnë fuqizimin e shteteve tona dhe lehtësimin e jetëve të qytetarëve.

“Shteti i Kosovës, sikurse edhe Shqipëria, e kanë të qartë orientimin proeuropian dhe euroatlantik. Jemi përkrah Shteteve të Bashkuara të Amerikës, të Bashkimit Europian dhe vendeve demokratike, jo vetëm sa i përket zhvillimeve në rajon, por në gjithë kontinentin tonë, sidomos me sfidat që po përballemi si kontinent në këto dy vitet e fundit. Ne jemi të vendosur për të kontribuar në funksion të paqes dhe stabilitetit, dhe të mbrojmë së bashku vlerat që po rrezikohen dhe atakohen nga Rusia dhe satelitët e saj në rajon.”

Me këtë rast, Presidentja e Kosovës tha se e kemi po ashtu detyrim që së bashku të punojmë për avancimin e interesave të të gjithë shqiptarëve në rajon, të cilëve vazhdimisht u shkelen të drejtat elementare, si atyre që jetojnë në Preshevë, Medvegjë dhe Bujanoc.

“Përderisa politika shtetërore e Serbisë vazhdimisht po e sfidon integritetin territorial të Kosovës dhe angazhohet në agresion institucional kundër Kosovës në baza të rregullta, ne do të kemi nevojë për përkrahjen e Shqipërisë e po ashtu për përkrahjen e aleatëve dhe partnerëve euroatlantikë,” tha Presidentja e Kosovës, Vjosa Osmani, duke përfunduar:

“Rruga e vetme që sjell paqe dhe stabilitetin për gjithë rajonin tonë është atëherë kur rezultati përfundimtar do të jetë njohja reciproke dhe ruajtja e integritetit territorial, sovranitetit, rendit kushtetues dhe funksionalitetit të brendshëm të Republikës së Kosovës.”

Begaj: Kosova të koordinohet me SHBA-të dhe BE-në

Presidenti i Republikës, Bajram Begaj, nuk kishte se si ta artikulonte ndryshe mendimin e tij politik përderisa ka për shef Edi Ramën.

“Marrëdhëniet Shqipërisë e Kosovës janë shumë të mira. Askush nuk ka pse çuditet se pse Kosova është prioritet kombëtar i Shqipërisë, i rikonfirmova presidentes mbështetjen për Kosovën,” tha Bajram Begaj duke u krenuar se Kosova është tregu i dytë për eksportet e Shqipërisë. 

Shefi i tij nuk flet dot për veriun e Kosovës, ndërsa Begaj tha se duhet koordinimi me aleatët tanë ndërsa ka vlerësuar hapat e qeverisë së Kosovës për depërshkallëzimin e situatës në veri, ndërsa për dialogun shtoi:

“Bashkërendimi i politikave dhe veprimi i të gjithë institucioneve tona duhet të jetë një objektiv i qëndrueshëm dhe parësor pasi kështu krijojmë të gjitha premisat që faktori shqiptar të konsolidohet si faktor strategjik dhe stabiliteti në rajon. Jashtë vëmendjes nuk mund të mbeteshin zhvillimet në veriun e Kosovës.

Pavarësisht provokimeve për të tensionuar situatën në komunat me shumicë serbe në veriun e Kosovës dhe ndërhyrjet hibride nga aktorë të tretë dashakeqës, duhet një koordinim më i mirë me partnerët tanë kryesorë, Shtetet e Bashkuara të Amerikës dhe Bashkimi Evropian për të gjitha veprimet e ndërmarra,” tha Begaj të cilit i kishin thënë se askush nuk mund të vendosë në pikëpyetje sovranitetin dhe integritetin territorial të Kosovës por koordinimi me partnerët është i domosdoshëm.

“Dialogu i ndërmjetësuar nga BE dhe i mbështetur nga Shtetet e Bashkuara është rruga e vetme drejt paqes si dhe anëtarësimit të Kosovës në organizatat rajonale dhe ndërkombëtare përfshirë edhe atë të organizatës së Kombeve të Bashkuara. E sigurova zonjën Osmani për mbështetjen e plotë dhe angazhimin e Shqipërisë për të kontribuar me çdo mjet me të gjitha mundësitë e saj në mënyrë konstruktive në funksion të këtij dialogu.”

Ndryshe, pas takimit me Presidentin e Republikës, Presidentja Vjosa Osmani takoi Kryemnistrin Edi Rama ndërsa nesër me rastin e Ditës së Nënë Terezës, është parashikuar një aktivitet i përbashkët i dy Presidentëve në ekspozitën e Arkivave.

Nesër do vizitoj Beratin dhe Durrësin ku dhe do vizitojë pikën doganore të Kosovës në Portin e Durrësit.