Takimi i deputetëve të opozitës, Berisha: Misioni ynë, ringjallja e shpresës!

Në takimin e deputetëve opozitarë i cili u organizua nga deputeti i Partisë Demokratike, Gazment Bardhi, ai bëri thirrje që sot të unifikohet edhe një qëndrim i aksionit opozitar kundër keqqeverisjes së Edi Ramës duke e nisur me një agjendë parlamentare.

Ndërsa Kryetari i Partisë Demokratike, Sali Berisha, këtë takim e cilësoi si mesazh të duhur për 600 mijë qytetarët që votuan opozitën ndërsa u shprehë qartë se misioni tyre është ringjallja e shpresës

“Lidhur me përgjigjen pozitive të kësaj ftese të sinqertë si dhe lidhur me një shqetësim që e kemi bashkë ndarë gjatë gjithë këtyre ditëve, për mënyrën se si do të duhet me përgjegjshmëri secili prej nesh të gjejë formën ta bëjë funksionale opozitën parlamentare.

Për fat të keq debatet brenda opozitën gjatë këtyre dy viteve i kanë krijuar një komoditet një prej qeverive më të korruptuara në Europë po e po por ndoshta edhe në glob.

Kjo e bën emergjente në gjykimin tim por e kemi ndarë edhe me njëri tjetrin gjatë këtyre ditëve, këtë takim të parë me prezencën e të gjithë deputetëve të opozitës në parlament,” tha në fillim të fjalës Gazment Bardhi duke mos harruar të përshëndes dhe kolegët që ishin online pasi ndodhen jashtë vendit, zonjën Tabaku, Ilda Dhori, zotin Lefter Gështenja dhe zotin Petrit Doda.

“E kam thirrur këtë takim me besimin se çështjet që na ndajnë janë shumë më pak se çështjet që na bashkojnë.

Në një nga çështjet që na bën të gjithëve bashkë, është prioriteti që kemi shpallur në tre sesione të shkuara parlamentare por që nuk ka shkuar asnjë hap përpara.

Të gjithë kemi eksperiencën e masakrës zgjedhore të 25 prillit dhe të 14 majit që bën urgjente detyrën për çdo deputet të opozitës për të caktuar si prioritet të punës tonë në parlament reformën zgjedhore.

Edhe pse gjatë kësaj periudhe ka ekzistuar një Komision për këtë reformë  por për fat të keq në dy vite punë nuk ka prodhuar asnjë produkt dhe çështja e parë që do duhet të diskutojmë është se si opozita do ta çojë përpara reformën zgjedhore,” tha Bardha se të gjithë bien dakord dhe askush nuk ka iluzionin se masakra zgjedhore dhe mënyra se si Edi Rama organizon zgjedhjet jo të gjitha fenomenet kriminale mund të zgjidhen nëpërmjet ndryshimeve të reformës zgjedhore por ka disa çështje që duhet të jenë prioritet për tu adresuar me ligj.

“Edhe gushti na provoi se kemi përpara qeverinë më të papërgjegjshme në historinë e Shqipërisë çdo ditë prodhohet nga një skandal çka bën nevojën e ndërtimit të një agjende llogaridhënie në Parlament përmes ngritjes së disa komisioneve hetimore.

Meqë është takimi i parë që nga zgjedhjet e 25 prillit sot duhet të flasim për çështje që na bëjnë bashkë pa lënë mënjanë edhe diskutimet e tjera në dobi dhe interes të qytetarëve dhe opozitës në vend por duke e nisur me çështjet që na bëjnë bashkë për të krijuar një agjendë të përbashkët parlamentare dhe kam bindjen e thellë që ne të gjejmë zgjidhje edhe për probleme që sot mund të duken në qëndrime krejt të kundërta me njëri tjetrin.

Unë respektoj dhe secili në këtë sallë respekton qëndrimin e secilit koleg për çështje që na ka ndarë në këtë moment. Por ndasitë në mendime dhe qëndrime brenda partisë tonë PD nuk duhet të na shfokusojnë nga përgjegjësia që kemi ndaj qytetarëve demokratëve dhe opozitarëve,” tha deputeti i PD, Gazment Bardhi, duke përfunduar:

“Ndaj bindjen me shumicën prej jush që sot të unifiokojmë një qëndrim të aksionit tonë opozitar kundër keqqeverisjes së Edi Ramës duke e nisur me një agjendë parlamentare.”

Ndërsa Kryetari i Partisë Demokratike, Sali Berisha, duke falënderuar përzemërsisht Gazment Bardhin dhe të gjithë ata të cilët në një moment shumë të rëndësishëm të jetës politike, u angazhuan për thirrjen dhe mbajtjen e këtij takimi të shumëpritur nga populli i përçmuar opozitar, vlerësoi se takimi i sotëm është mesazh i duhur për 600 mijë qytetarët që votuan opozitën.

“Tu falënderoj të gjithë ju që jeni sot këtu dhe shpreh bindjen se, në kushtet në të cilat ndodhet Shqipëria, misioni i opozitës shqiptare është më i vështiri që ai ka pasur në 32 vite, por njëkohësisht ështe edhe më vendimtari.

Ne ulemi këtu me mandat deputeti dhe jemi kaq dhe të tjerë që nuk janë këtu, por në fund të fundit, nuk duhet të harrojmë kurrë se mandat tona janë marrë në një terren në të cilin qeveria ka diktuar më të gjitha mënyrat, vullnetin e qytetarëve shqiptarë. Ka krijuar një reaksion fatal në të cilin krimi shndërrohet në vota dhe vota në krim.

Ky reaksion është shndërruar në një faktor pothuajse përcaktues të spastrimit etnik të Shqipërisë sa kurrë ndonjëherë në historinë e saj. Nga ky rreth vicioz nuk ka asnjë mekanizëm tjetër dalje përveç se përgjegjësive të opozitës.

Në rast se e sheh dhe analizon këtë rreth vicioz padiskutim që ka vend për fatalitet, por opozita nuk është ajo që mund të pranojë kurrë të bjerë në fatalitet, por është ajo që ka detyrën, ka misionin ligjor dhe moral të japë zgjidhje, të krijojë shpresën dhe të ngjallë shpresën. Dhe unë mendoj se ky takim i ynë sot është mesazhi më i duhur që ne u dërgojmë mbi 600 mijë qytetarëve që në kushtet më të pabarabarta në 32 vite, qëndruan si idealist dhe votuan opozitën në farsën elektorale të 14 majit,” tha Berisha duke folur dhe për hapa konkret opozitar me protesta të qëndrueshme popullore që i japin vendin e merituar Edi Ramës, si dhe të ngrehen komisione hetimore parlamentare.

“Nuk është një mision i lehtë, është një mision shumë i vështirë. Është një mision i vështirë sepse Edi Rama ka krijuar mekanizmat kriminale të grabitjes së mandateve dhe është në bindjen time me të thellë se vetëm protestat e qëndrueshme popullore mund ti japë vendin atij. Por kjo nuk mund të jetë armë e vetme e opozitës.

Opozita në vlerësimin tim, ka dhe duhet të shfrytëzojë çdo hapësirë.

Në radhë të parë në parlament, i cili drejtohet në mënyrën më staliniste që është drejtuar në 32 vite. Por megjithatë ne duhet të bëjmë gjithçka për një bashkërendim dhe për të shfrytëzuar çdo hapësirë për të nxjerrë në shesh të vërtetën e këtij regjimi.

Zonja dhe zotërinj deputetë!

Para 1 muaji është arrestuar Pëllumb Gjoka. Unë ju garantoj ju se shumëfishi i tij është Edi Rama, me të gjitha lidhjet e tij dhe dokumentet. Jo vetëm që po jepte atë licencën me 5 yje për të marrë kazinonë, por edhe për një seri arsyesh të tjera. E them këtë për ta ditur qytetarët se me çfarë përballet ai dhe përfaqësuesi i tij.

Por përsëri aktiviteti eficent i yni, si deputetë të opozitës ka një rëndësi të jashtëzakonshme. Një komision parlamentar hetimor u krijua për djegësat. Shënoi një kthesë. Nuk mund ta mohojmë. Duhet ta pranojmë se shënoi një kthesë sepse është e zakonshme të thuhet se këto komisione nuk kanë sjellë gjë. Jo nuk është ashtu.

Ai komision, po flas për atë, por edhe të tjera mund të ketë, ai shënoi një kthesë në qëndrimin tërësor ndaj vjedhjes më të madhe të realizuar. Sigurisht Edi Rama po i mbron balozët kryesorë, por ama ata tani janë të zhveshur para shqiptarëve.

Me këtë rast, Kryetari i PD u zotua se opozita do të bëjë gjithçka që vendi të ketë një Kod Zgjedhor që të japë zgjedhjet më të drejta të mundshme për qytetarët shqiptarë.

“Nuk janë më pak aferat e shëndetësisë që kanë kushtuar mijëra e mijëra jetë. Nuk është më pak konflikti i interesit. Ministrja i jep burrit tenderin, Edi Rama akrabasë, e kështu me radhë.

Ne kemi një rol shumë të madh, gjithashtu mendoj në një legjislacion tërësor të ri, për luftën kundër vjedhjeve qeveritare dhe korrupsionit.

Kombet që janë në vështirësi përdorin ligje të forta, në mënyrë që të dominojnë një fenomen që po e rrënojnë, shkatërrojnë atë.

Kemi reformën për zgjedhjet. Ai siç e dini është i aftë për çdo gjë për të përcaktuar kuadrin zgjedhor, por besoj se përcaktimin më të vërtetë të jetës së tij, e bëri kur tha; Kodi zgjedhor është një kinezëri.

Megjithatë ne do të bëjmë gjithçka që vendi të ketë një kod zgjedhor që të japë zgjedhjet më të drejta të mundshme për qytetarët shqiptarë,” tha Kryetari i Partisë Demokratike duke i ftuar deputetët prezentë që të vijnë nesër në prezantimin e Raportit për farsën elektorale të 14 majit.

“Unë nuk dua të zgjatem më shumë, por edhe njëherë shpreh vlerësimin tim. Ftoj ju sipas kohës së lirë që keni, nesër në një paraqitje që ne i bëjmë raportit për farsën elektorale të 14 majit.

Është bërë një punë mendoj unë, shumë e çmuar.

Asgjë nuk ka që ne nuk dimë, por ka një gjë, që ne faktojmë dhe dokumentojmë, ngrihemi kundër atij koncepti që thotë se; ky i vjedh, por i fiton zgjedhjet.

Jo. Ky i vjedh zgjedhjet dhe zgjedhjet e vjedhura nuk janë të fituara. Dhe këtu ne duhet të dokumentojmë dhe besoj se ne ja kemi dalë atij qëllimi, me atë raport që paraqitet me shumë dokumente.

Edhe njëherë ju falënderoj për organizimin dhe ju garantoj se ne jemi shumë të vendosur, sikundër duhet të zgjerohemi në takime të tjera,” tha Kryetari i Partisë Demokratike, Sali Berisha, duke përfunduar:

“Ky është një takim i deputetëve të dalë nga lista e PD-së në zgjedhjet e 2021. Bashkërendimi me forca të tjera politike opozitare si Partia e Lirisë dhe nëse dëshirojnë shumë të mirëpritur edhe Partia për Drejtësi Integrim dhe Unitet e Idrizit dhe të kemi një front të gjerë dhe eficent.

Të bashkërendojmë përpjekjet ndaj një regjimi që nuk ka asnjë ligj, asnjë normë, asnjë moral.”

Ndryshe, në takimin e deputetëve të koalicioni PD-AN organizuar nga Gazment Bardhi morën pjesë 43 deputetë ndërsa u braktis nga deputetët e PDIU dhe deputetët që tashmë menaxhohen nga Edi Rama dhe për brigadier u ka caktuar Lulzim Bashën!