Blinken: SHBA dënon ashpër sulmet e koordinuara të dhunshme ndaj Policisë së Kosovës

Sekretari amerikan i Shtetit, Antony Blinken, duke dënuar ashpër sulmet e koordinuara të dhunshme ndaj Policisë së Kosovës pranë Manastirit të Banjskës tha se sulmet e dhunshme ndaj Policisë së Kosovës janë të papranueshme.

“Shtetet e Bashkuara të Amerikës dënojnë ashpër sulmet e koordinuara të dhunshme ndaj Policisë së Kosovës pranë Manastirit të Banjskës më 24 shtator dhe shprehin ngushëllime të thella për familjen e rreshterit të Policisë së Kosovës të vrarë në krye të detyrës.  Autorët e këtij krimi duhet të mbajnë përgjegjësi nëpërmjet një procesi hetimor transparent,” tha Sekretari Blinken duke saktësuar se Policia e Kosovës ka përgjegjësi të plotë për zbatimin e sundimit të ligjit në Republikën e Kosovës.

“Shtetet e Bashkuara e njohin dhe respektojnë rolin e Policisë së Kosovës si reaguese e parë në situata emergjente dhe krize,” tha Blinken duke shtuar se Shtetet e Bashkuara vlerësojnë koordinimin e ngushtë të Policisë së Kosovës me Misionin e BE-së për Sundimin e Ligjit në Kosovë dhe me Forcën e NATO-s në Kosovë, veçanërisht në garantimin e sigurisë së civilëve në vendngjarje.

“Ne do të vazhdojmë të monitorojmë situatën dhe të koordinohemi me të gjithë të përfshirët,” tha Sekretari i Shtetit Blinken në reagimin e tij përmes rrjetit social X duke përfunduar:

“I bëjmë thirrje qeverive të Kosovës dhe Serbisë që të shmangin veprimet që mund të nxisin më tej tensionet dhe t’i kthehen menjëherë dialogut të lehtësuar nga BE-ja.”