Rama: Futën fjalorin e sjelljet e rrugës në politikë! Bardhi: Edi Rama futi trafikantë, vrasës e hajdutë!

Pas reagimit të Edi Ramës lidhur me seancën e sotme është përgjigjur Kryetari i Grupit Parlamentar të PD, Gazment Bardhi, duke i kujtuar Kryeministrit se ishte ai që në politik e Parlament futi përfaqësues të krimit të organizuar, trafikantë, vrasës e hajdutë.

“Edi Rama futi në politikë e parlament përfaqësues të krimit të organizuar, trafikantë, vrasës e hajdutë, duke e bërë Shqipërinë të vetmin vend në Europë që kishte nevojë për miratimin e një ligji për dekriminalizimin e politikës,” tha Gazment Bardhi duke përfunduar:

Sot si një frikacak i kapur në flagrancë me aferat korruptive miliona euro që hetohen e gjykohen çdo ditë nga drejtësia, kishte futur në sallën e Kuvendit 65 gardistë, për ta mbrojtur ndërsa miratonte si manikin buxhetin që financon vetëm PPP korruptive dhe projektet që injektojnë më shumë para për tenderat që kontrollohen nga krimi i organizuar.” 

Ndryshe, Kryeministri Edi Rama, personi që deligjitimoi funskionimin e Parlamentit, pas kaosit të krijuar në seancë plenare akuzoi sot opozitën se ka prekur fundin.

“I futën fjalorin e sjelljet e rrugës në politikë, ndërsa politikën e hodhën në mes të katër rrugëve, duke mbjellë sherr, rrëmujë, dhunë dhe korrur humbje, humbje, humbje,” shprehet Edi Rama përmes rrjetit social X duke përfunduar:

Tanimë kanë prekur fundin, ku i ka marrë me vete halli i një të kërkuari nga drejtësia, që nuk do t’i lëshojë derisa të shkërmoqen e të ridalin copa e çika mbi ujë, si mbeturinat e një anijeje të mbytur.”