BE: Parlamenti me rol mbikëqyrës dhe legjislativ, shtyllë qendrore e integrimit!
Pas kaosit të krijuar në seancën e fundit plenare ku Parlamenti i Edi Ramës e kaloi buxhetin e vitit 2023 për vetëm 5 minuta, ka reaguar Delegacioni i Bashkimit Europian në Tiranë duke rikujtuar se një Parlament funksional me rol efektiv mbikëqyrës dhe legjislativ është shtyllë qendrore e procesit të anëtarësimit në BE.
“Pas zhvillimeve të fundit në Parlamentin e Shqipërisë, Bashkimi Evropian rikujton se një Parlament funksional që ushtron një rol efektiv mbikëqyrës dhe legjislativ është një shtyllë qendrore e procesit të anëtarësimit në BE,” shprehet Delegacioni i BE në Tiranë në reagimin e tij përmes rrjetit social Facebook duke përfunduar:
“Dialogu politik konstruktiv dhe gjithëpërfshirës në parlament është shumë i rëndësishëm dhe në interes të qytetarëve shqiptarë.”
Ndryshe, ky reagim i Delegacionit të BE në Tiranë vjen pas reagimit të Ambasadës së SHBA në Tiranë dhe asaj të Britanisë së Madhe, që më në fund shprehen të shqetësuara për situatën e krijuar në Parlament.
Ndërkohë Edi Rama, personi që deligjitimoi funskionimin e Parlamentit, pas kaosit të krijuar në seancën e fundit plenare akuzoi opozitën se futi fjalorin e sjelljet e rrugës në politikë; I menjëhershëm ishte reagimi i PD e cila përmes Kryetarit të Grupit Parlamentar, Gazment Bardhi, i kujtoi Kryeministrit se ishte ai që në politik e Parlament futi përfaqësues të krimit të organizuar, trafikantë, vrasës e hajdutë.
Kështu, ndërsa opozita vazhdon përpjekjet për bllokimin e punimeve parlamentare deri sa të përmbushen 3 kërkesat e tyre për ngritjen e komisioneve hetimore, socialistët stoikë për shkatërrimin e jetës parlamentare kërcënojnë me ndëshkime dhe përjashtojnë deputetët e opozitës nga Parlamenti i Edi Ramës!
