Opozita është në këmbë! Berisha: Me Edi Ramën, të ardhme nuk ka!
Me Edi Ramën ka vetëm vjedhje të zgjedhjeve, vjedhje të pasurisë kombëtare, vjedhje të buxhetit të shtetit, dhe largim masiv të shqiptarëve nga Shqipëria, tha Kryetari i Partisë Demokratike, Sali Berisha, para mbështetësve të tij në Rrugën Shpresës, në vullnetin dhe guximin e të cilëve, tha ai, është përgjigja e merituar
“Sot ishte një ditë beteje në parlament. Opozita, e cila qe parashikuar të mos ekzistonte, të ishte thjesht një stoli e armikut më të egër të qenies së shqiptarëve, regjimit të Edi Ramës, sot është më në këmbë se kurrë. Opozita kaloi, mbijetoi skenarë nga më antidemokratikët, më antishqiptarët, por e veshur me idealet më fisnike të popullit opozitar, ajo është sot këtu në këmbë, e gatshme për çdo betejë pa kthim, gjer në fitore,” tha Sali Berisha nga “Rruga e Shpres” aty ku edhe mbrëmjen e sotme vazhdojnë të protestojnë të gjithë ata demokratë që e mbështesin dhe kundërshtojnë vendimin socialist të SPAK-ut dhe GJKKO-së për arrest shtëpie të liderit të tyre.
Duke u përulur me nderim të thellë para qëndrestarëve të pamposhtur në ditët e vështira për këtë vend, Kryetari i Partisë Demokratike tha se Shqipëria sot është e gjunjëzuar, por, ajo nuk është e rrëzuar përdhe.
“Fati i Shqipërisë, e ardhmja e Shqipërisë është në duart tuaja. Është në guximin tuaj. Në ndërgjegjen tuaj. Në qëndresën tuaj. Me Edi Ramën, të ardhme nuk ka.
Me Edi Ramën ka vetëm vjedhje të zgjedhjeve, vjedhje të pasurisë kombëtare, vjedhje të buxhetit të shtetit, mashtrime, largim masiv të shqiptarëve nga Shqipëria.
Ndaj dhe është në duart tona, është në vullnetin tonë, është në guximin tonë, t’i japim atij përgjigjen e merituar,” tha Kryetari i Partisë Demokratike, Sali Berisha, duke e çuar sërish një mesazh drejt Surrelit:
“Këtu para jush dhe në emër tuaj, do i çoj prapë një mesazh në Surrel, në Surrelin që nxin, në Surrelin e territ, në Surrelit të kryehajdutit të Kombit.
Edi Rama, kjo rrugë ka dritë, kjo rrugë ka shpresë, kjo rrugë nuk mposhtet, kjo është rruga e fitores, kjo është rruga e Shqipërisë, kjo është rruga e shqiptarëve.”
Fjala e plotë:
Mirëmbrëma dhe përshëndetjet më të përzemërta!
Miqtë e mi, përulem me nderimin më të thellë para jush, qëndrestarë të pamposhtur në ditët e vështira për këtë vend. Shqipëria sot është e gjunjëzuar. Por ajo nuk është e rrëzuar përdhe dhe kjo vetëm për një moment, sepse ju në emër të saj, jeni këtu çdo natë, të pamposhtur dhe në këmbë.
Jeni këtu për t’i dëshmuar Shqipërisë se ajo nuk do të rrëzohet përdhe kurrë! Jeni këtu për t’u bërë thirrje shqiptarëve të ngrihen, sepse Shqipëria që ju përfaqësoni, është Shqipëria që do fitojë, është Shqipëria që do ngrihet!
Le të bëjmë pak së bashku një udhëtim në memorien tonë dhe të kujtojmë se pak vite më parë, vendi ynë i gjunjëzuar ishte Shqipëria e fitores.
Liberalizoheshin vizat, integrohej në NATO, priste me dinjitet presidentin e SHBA-ve, merrte rekomandimin për statusin e vendit kandidat. Nga Tirana, shpallej pavarësia e Kosovës. Shqipëria bëhej çdo ditë një vend më i pëlqyer, më i dashur për shqiptarët, më i respektuar në rajon, në Europë dhe në botë.
Shqipëria bëhej vendi në të cilin popullata rritej nga viti në vit. Dhe po kështu dashuria, shpresa dhe besimi i shqiptarëve rritej nga viti në vit. Por përsëri, me qëndresën tuaj, me guximin tuaj, kam bindjen absolute se Shqipëria falë jush, falë të rinjve dhe të rejave të këtij vendi, falë burrave dhe grave të pamposhtur, falë luftëtarëve, falë misionarëve që mblidhen çdo natë në këtë rrugë, rrezatojnë shpresë në mendjet dhe zemrat e shqiptarëve, përsëri ajo do jetë në këmbë. Përsëri ajo do jetë Shqipëria e fitoreve.
Luani i fjetur i shqiptarëve po zgjohet çdo ditë e më shumë. Autokracinë, diktaturën e bandave, krimit dhe drogës e pret fundi i merituar.
Miqtë e mi!
Sot ishte një ditë beteje në parlament. Një ditë beteje këtu në ‘Rrugën e Shpresës.’
Opozita, e cila qe parashikuar të mos ekzistonte, të ishte thjesht një stoli e armikut më të egër të qenies së shqiptarëve, regjimit të Edi Ramës, sot është më në këmbë se kurrë. Opozita kaloi, mbijetoi skenarë nga më antidemokratikët, më antishqiptarët, por e veshur me idealet më fisnike të popullit opozitar, ajo është sot këtu në këmbë, e gatshme për çdo betejë pa kthim, gjer në fitore.
Miqtë e mi!
Ju jeni njerëz të lirë, jeni guximtarë, jeni vizionarë, jeni të rinj dhe të reja, burra dhe gra në një mision epik. Ju si opozitë e vërtetë, i keni kallur datën, tmerrin narkoregjimit të Edi Ramës. Dhe pse kështu?
Imagjinoni një moment, i tmerruar nga Sali Berisha, Edi Rama urdhëron mercenarët e tij në KQZ, në gjykata, që të mos regjistrojnë emrin e tij në fletën e votimit. Urdhëron mercenarët e tij që t’i rrëmbejnë logon dhe emrin PD. Urdhëron mercenarët e tij të ndërpresin çdo financim për kandidatët e saj. E megjithatë, opozita mori 600 mijë vota. Kjo e tmerroi Edi Ramën. Kjo e tërboi Edi Ramën.
Ai e pa se po vjen furtuna. Ai e pa se opozita e vërtetë është e pamposhtur, ndaj dhe bllokoi çdo të drejtë të deputetëve në parlament. Por deputetët tuaj, deputetët e vërtetë të opozitës ia bllokuan parlamentin narkoshtetit. E shndërruan atë në një kufomë-parlament. E shndërruan atë në një turp-parlament. E shndërruan atë ashtu siç është, në një krim-parlament.
E shndërruan në institucionin më qesharak të planetit, i cili voton buxhetin për 4 minuta. E shndërruan faktikisht në inekzistencë.
Një nderim të veçantë kam për të gjithë këta deputetë që në emër tuaj, po zhvillojnë betejën pa kthim në mosbindje civile, më të fuqishme që ka njohur ndonjëherë parlamenti. Por Edi Rama, përsëri i tmerruar, mendoi se duke përdorur mercenarët e tij, armiqtë e egër të opozitës, Dumanër, Kraja dhe kompani, do mund të godasë për vdekje opozitën.
Ai ndërmori një akt të paparë në një vend të lirë. Urdhëroi organizatën kriminale të SKAP-it të partisë të vendosi në arrest shtëpie, pa asnjë provë, fakt, dokument, kundërshtarin e tij Sali Berisha, vetëm e vetëm se ai e pa sepse duke i hequr emrin nga lista, duke i plaçkitur vulën dhe logon, duke mos dhënë asnjë qindarkë, de facto duke e përjashtuar nga gara, përsëri me mbështetjen tuaj, ai mori së bashku me ju 600 mijë vota.
Por përsëri i bëri llogaritë gabim, përsëri humbi.
Ne jemi në këmbë, jemi të sigurt, jemi të fuqishëm, ne do fitojmë!
Këtu para jush dua t’u drejtoj një thirrje mbarë demokratëve dhe opozitarëve: ngrihuni në këmbë, siç janë ngritur këta të rinj dhe të reja, burra dhe gra, siç janë ngritur deputetët tanë. Sepse ora ju fton ju, idealet ju ftojnë ju, e ardhmja juaj dhe e fëmijëve tuaj ju ftojnë ju. Dashuria për Shqipërinë ju fton ju.
E ardhmja e këtij vendi, trashëgimia e këtij vendi, ndaj të ngrihemi të gjithë në këmbë në betejën epike, në betejën e historisë, në betejën pa kthim, të përmbysim diktaturën e instaluar në Shqipëri.
Fitoni ju, fitojnë fëmijët tuaj, fiton Shqipëria, fiton pluralizmi, fiton e ardhmja, fiton demokracia.
Iu bëj një thirrje miqësore mbarë intelektualëve shqiptarë: ngrihuni sot më shumë se kurrë. Për intelektualin i cili ka për busull të vërtetën, kjo është ora e të vërtetës. Kjo është ora e të vërtetës supreme, në të cilën beteja është për shpëtimin e atyre të vërtetave që janë më të shtrenjta për çdo njeri, për shpëtimin e atyre të vërtetave që janë më të shtrenjtat për çdo shoqëri, për çdo komb, për çdo vend.
Dhe këto të vërteta janë të vërtetat e lirisë, e dinjitetit njerëzor, të vërtetat e shtetit ligjor, të vërtetat e një rendi demokratik, e pluralizmit politik.
Intelektuale edhe intelektualë, sot kudo që jeni, në Shqipëri dhe larg saj, vendi juaj u thërret, kombi juaj ju thërret si luftëtarë të të vërtetave, të dilni në sheshbetejë, të dilni në betejë pa kthim, sepse kjo betejë është vendimtarë për shpëtimin e Shqipërisë, për shpëtimin e kombit shqiptar, që në fakt ndodhet sot në ditën më të vështirë nga pushtuesi më i egër, më shfarosës që ai ka njohur në histori, Edi Rama dhe narkoshteti i tij.
Një thirrje kam për të gjithë bizneset e vendit. Ju që jetoni çdo ditë në terrorin e taksidarëve patronazhistë, e gjobave dhe ryshfeteve të tyre, ngrihuni t’i japim fund këtij tmerri pa fund për ju dhe të dalim në rrugën e ligjit, të drejtësisë, të barazisë.
Nuk ka paqe mbi krimin, nuk ka paqe mbi dhunimin e ligjit. Qepenat tuaj duhet t’i shndërroni në mjete të fuqishme, në armë kundër armikut të përbashkët, Edi Rama.
Në emër tuaj, u bëj një thirrje vëllazërore mbarë fermerëve të Shqipërisë, ju të cilët jeni fermerët më të diskriminuar në Europë, jeni qytetarët më të përçmuar të këtij vendi, jeni familjet më të ndëshkuara të Shqipërisë, ngrihuni të përmbysim këtë regjim, armik i egër i qenies suaj.
Të përmbysim këtë regjim që po shfaros, po shkatërron qindra e mijëra ferma çdo ditë. Po shndërron fshatin, fermat tuaja në një shkretëtirë, në një zbrazëtirë të vërtetë.
Ngrihuni, sepse në këtë mënyrë ju mbroni jo vetëm fermat tuaja, jo vetëm prosperitetin dhe të ardhmen tuaj, por mbroni Shqipërinë që në shekuj e shekuj e keni sjellë mbi supe së bashku me qytetarët e tjerë me besimin e madh se do e çoni në Europë dhe nuk do e lini më tutje në kthetrat e një armiku të qenies së shqiptarëve.
Iu bëj thirrje përsëri të gjithë shqiptarëve, të ngrihen kundër këtij regjimi që objektiv kryesor, që veprimtari kryesore, që qëllim kryesor ka vjedhjen tuaj, vjedhjen e shqiptarëve.
Miqtë e mi!
Sot është një ditë e trishtë për vendin. Sot, një nga hajdutët më të neveritshëm, më të shpërfytyruar të Shqipërisë bëhet superministër me tre portofole.
Blendi Gonxhe është njeriu që përmbyti Tiranën, është hajduti që blinte pemë me 6500 euro copën. Është vjedhësi i neveritshëm që rikonstruktonte dy herë në vit zyrat e tij vetëm për të vjedhur. Është njeriu që ndërtoi në një shërbim shumë të rëndësishëm për qytetarët, sistemin më të neveritshëm të sekserëve të tij, për t’i vjedhur, për të mbushur xhepat, për të pasuruar veten dhe familjen e tij.
Blendi Gonxhe është hajduti që përfundoi para pak muaj të ndërtojë ndërtesën e drejtorisë së tij me një kosto 1350 euro metrin katror. Natyrisht ai vodhi të paktën 70-80 përqind të kostos dhe asnjë diskutim me ato ai u bë ministër, sepse i ndau me bosin e tij, që ndan dhe pret, që vjedh edhe kur flen dhe ky është Edi Rama.
Miqtë e mi!
Fati i Shqipërisë, e ardhmja e Shqipërisë është në duart tuaja. Është në guximin tuaj. Në ndërgjegjen tuaj. Në qëndresën tuaj.
Me Edi Ramën, të ardhme nuk ka.
Me Edi Ramën ka vetëm vjedhje të zgjedhjeve, vjedhje të pasurisë kombëtare, vjedhje të buxhetit të shtetit, mashtrime, largim masiv të shqiptarëve nga Shqipëria.
Ndaj dhe është në duart tona, është në vullnetin tonë, është në guximin tonë, t’i japim atij përgjigjen e merituar.
Këtu para jush dhe në emër tuaj, do i çoj prapë një mesazh në Surrel, në Surrelin që nxin, në Surrelin e territ, në Surrelit të kryehajdutit të Kombit.
Edi Rama, kjo rrugë ka dritë, kjo rrugë ka shpresë, kjo rrugë nuk mposhtet, kjo është rruga e fitores, kjo është rruga e Shqipërisë, kjo është rruga e shqiptarëve.
Rrofshi ju, rroftë Shqipëria! Fitore, fitore, fitore!
