Drita e së vërtetës do ndriçojë rrugën e fitores, Berisha: Edi Rama, do pastrojë kalbësirat e sarajeve të Surrelit

Duke shpreh edhe sonte pakënaqësinë me armën e të vërtetës, Kryetari i Partisë Demokratike, Sali Berisha i bëri thirrje demokratëve në “Rrugën e Shpresës” që të mbrojnë dinjitetin e tyre me armën e të vërtetës i bindur se drita e së vërtetës do të ndriçojë çdo ditë rrugën tonë drejt fitores ndërsa siguroi Edi Ramën, se kjo dritë do pastrojë edhe Kryeministrin dhe kalbësirat e sarajeve të tij në Surrel.

“Në këtë betejë ne jemi të sigurt në fitoren tonë. Në qoftë se me akuzat për korrupsion u shpalla non-grata, koha provoi se u riktheva edhe fuqishëm edhe njëherë në krye të PD.

Në qoftë se me akuzën për korrupsion në dosjen Partizani, vendosën Sali Berishën në arrest shtëpie, ju garantoj se kjo akuzë, se ky qëndrim, se kjo betejë e jona, do na çojë ne drejt fitores së sigurt. Ne do fitojmë,” tha Sali Berisha i bindur se thirrja e tij për çdo qytetar të këtij vendi, të ngrihet me armën e të vërtetës, është sepse nuk ka armë më të pathyeshme se ajo.

“Shpreh pakënaqësinë tënde me armën e të vërtetës. Mbro dinjitetin tënd me armën e të vërtetës.

Bashkohu këtu me këta burra dhe gra, djem dhe vajza, të ecim së bashku drejt fitores.

Drita e vërtetës do të ndriçojë çdo minutë, çdo orë, çdo ditë rrugën tonë drejt fitores,” tha Kryetari i Partisë Demokratike para demokratëve që vazhdojnë ta mbështesin Sali Berishën dhe ta kundërshtojnë vendimin e GJKKO dhe SPAK për liderin e tyre në arrest shtëpie ndërsa siguroi në fund Kryeministrit.

Edi Rama, edhe në Surrel do vijë kjo dritë, do të pastrojë ty dhe kalbësirat e sarajeve tua.”

Fjala e plotë:

Mirëmbrëma dhe përshëndetjet më vëllazërore, urimin tim më të zjarrtë, rrugicën e shpresës e inauguruat sonte si Rruga e Shpresës.

Unë kam bindjen se ju, misionarë të vërtetë të shpëtimit të këtij vendi, shumë shpejt këtë rrugë do ta shndërroni në autostradën e shpresës, do ta emërtoni autostrada e shpresës.

Qytetin e Tiranës, mendjen dhe zemrën e kombit, do ta quani qytetin e shpresës, Tiranën e shpresës.

Dhe Shqipëria e tërë do jetë Shqipëria e shpresës.

Miqtë e mi!

Shumë armë në betejë të llojeve nga më të ndryshmet mund të ketë njeriu.

Por njëra është arma e të gjitha armëve, është superarma e të gjitha kohërave dhe kjo është e vërteta, të cilën ju po mbroni çdo natë, çdo ditë në këtë rrugë.

Nuk ka fat më të madh për njeriun sesa të vendosë të mbrojë të vërtetën.

Asgjë nuk transformon atë sesa ky vendim.

30 e ca vite më parë, unë isha një mjek shumë i pasionuar pas profesionit tim. Jetoja ditë e natë, të gjithë kohën e ndaja mes profesionit dhe familjes, familjes dhe profesionit.

Por, isha krenar se në atë profesion, të vërtetat e tij më dukeshin më të qarta, më të kapshme dhe ato më motivonin. Gradualisht të dashur miq, kuptova se përveç atyre të vërtetave të profesionit, kishte disa të vërteta më supreme, më eprore, më eprore, më hyjnore dhe këto të vërteta ishin liritë dhe të drejtat e njeriut.

Ishte liria e individit dhe liria kombëtare. Në besimin tim, absolutisht si një ushtar i thjeshtë, u armatosa me këto armë, vendosa të mbroj ato dhe së bashku me studentët dhe qytetarët shqiptarë, ne ndamë epoka, përmbysëm sisteme.

Shqipërinë e morëm nga thellësitë e territ të historisë dhe e anëtarësuam në NATO.

Miqtë e mi!

Në vitin 2013, unë dhe PD dhe ju së bashku dorëzuam pushtetin, dolëm në opozitë.

T’u them ju të vërtetën, në opozitë ato vite kam qëndruar absolutisht thjesht si një avokat i interesit publik, i të vërtetave, të cilat i interesonin publikut.

Nuk kam kërkuar asnjë funksion, jam përpjekur thjesht të ndjek jetën time private.

Por ama, kam nxjerrë në dritë, kam denoncuar siç e dini, çdo ditë vjedhjet e tmerrshme të Edi Ramës dhe qeverisë së tij.

Kam denoncuar, pa marrë parasysh asgjë, sarajet e Surrelit të ndërtuara në një kohë kur ai kishte të deklaruar 3800 euro. Pallatin e zonjës së tij në pajë, të ndërtuar pa asnjë faturë.

Kam denoncuar pa u lëkundur lidhjet e vëllait të tij me grupin e Xibrakës, lidhjet e Olsi Ramës me uzinën më të madhe të miellit të bardhë në Ballkan.

Kam vazhduar me armën e të vërtetës të denoncoj çdo akt, çdo vjedhje, çdo lidhje të tij me krimin.

Kam denoncuar aktet e tradhtisë së tij të madhe kombëtare ndaj Kosovës.

I them këto për çdo qytetar, i përsëris dhe njëherë se arma më e fuqishme, arma e të gjitha armëve është e vërteta.

Në kohën kur kundërshtova ndarjen e Kosovës, të dy qeveritë së bashku me Vuçiçin lobonin me dhjetëra e dhjetëra milionë euro kundër Sali Berishës.

Por unë vazhdoja me besimin tim te e vërteta, se ajo që po bëhej në Kosovë ishte një nga padrejtësitë e dyta të mëdha ndaj kombit shqiptar.

Ajo përbënte një nga aktet më madhore korruptive.

Edi Rama përdori të gjithë institucionet e tij për të kontrolluar me lupë me qindra vendime të Sali Berisha. Me qindra urdhra të tij dhe mijëra.

Dhe gjeti zero, gjeti zero, gjeti zero.

Miqtë e mi!

Nuk besoj se këto ishin shërbimi më i madh që unë bëra gjatë viteve në opozitë dhe jashtë çdo funksioni.

Por një shërbim ju garantoj se është më i madhi i të gjitha shërbimeve.

Refuzimi që i bëra aleancës Rama-Brava për të shndërruar korrupsionin në vdekjen e shqiptarëve.

E them këtë sepse ai vendimi ishte marrë dhe ishte vetëm kundërshtimi im me besimin tek e vërteta, në mbrojtje të interesave tuaja, që atë vendim e bëri hiç, e shndërroi në zero.

Ai do të ishte për ju, për kombin shqiptar, një goditje e vërtetë nukleare korruptive për të, qenien dhe të ardhmen e tij.

Pra, çfarë ndodhi?

Korrupsioni i tmerrshëm, i dakordësuar, i ujdisur Rama-Brava u vërsulën me të gjitha mjetet kundër atij që bëri pluhur planet e tyre për një vello të zezë korrupsioni mbi shqiptarët, nga e majta dhe e djathta dhe të gjitha anët.

U hakmorën si primitivë dhe përdorën si armë përsëri korrupsionin për të mposhtur antikorrupsionin e Sali Berishës dhe të vërtetat që ai mbronte.

E shpallën në një akt megakorruptiv ndërkombëtar të korrupsionit transnacional, me angazhimin direkt të superspekulantit të njerëzimit, Xhorxh Soros, të të degjeneruarit McGonigal, shpallën Sali Berishën për korrupsion, non grata, duke besuar se në këtë mënyrë, e arkivuan këtë 78-vjeçar në analet e harresës.

Por, përsëri beteja vazhdoi midis korrupsionit dhe antikorrupsionit. Sali Berisha, falë idealeve tuaja, trimërisë suaj, guximit tuaj, u ngrit si Feniks në një nga rikthimet më të rralla në histori.

Të dashur miq!

Atë ditë që unë kam vendosur të nis foltoret, njerëz të mi të afërt më pyetën: Sali, a je i sigurt që do kesh mbështetje?

Përgjigja ime ishte kjo: Unë kam besim se do kem mbështetje, por edhe sikur dhjetë vetë të vijnë, unë do të shkoj në atë takim dhe do mbroj të vërtetat që do mbroj.

Të dashur miq, pra, dy vite më parë u zhvillua një betejë e paparë midis korrupsionit dhe antikorrupsionit të Sali Berishës.

Gjithnjë i hapur, gjithnjë i sinqertë, gjithnjë duke deklaruar se një dokument, një fakt, një provë të vetme po gjetën, Sali Berisha largohet nga politika.

Por ju e patë, se qeveritë më të fuqishme të botës, në dy vite nuk nxorën dot asnjë fakt, asnjë dokument, asnjë provë.

Kurse unë qëndrova në të vërtetën që besoj, qëndrova në mbrojtjen e interesit të tuaj, në mbrojtjen e interesit të këtij vendi, të cilin e duan shumë miqtë, e duan shumë partnerët, por kurrë më shumë se ju dhe Sali Berisha.

Dje unë fola për Skënderbeun. Vite drite jemi larg prijësit të përjetshëm. Por secili prej nesh ka një copë të shpirtit të tij në shpirtin tonë. Secili nga ne ka një copë të zemrës së tij në zemrën tonë. Secili nga ne ka një grimcë të qëndresës së tij në qëndresën tonë.

Miqtë e mi, pasi humbën betejën me shpalljet non-grata mbi baza të korrupsionit transnacional, pa asnjë provë, fakt apo dokument, Edi Rama kaloi në një praktikë tjetër të shpifjeve dhe trillimeve nga më të ulëtat. Me mediat e tij, me lakejtë e tij, me puthadorët e tij çfarë nuk sajoi, dhe arritën te kulla 64-katëshe e Tiranës.

Vetëm sa nuk e emëruan kulla e Sali Berishës.

Miqtë e mi, mjeranë kompania e tyre. Sali Berisha në tetë vite në pushtet, nuk pranoi, nuk ndërtoi qoftë dhe një kullë të vetme në kryeqytetin e Shqipërisë.

Kështu që kulla u shndërrua në mullarin e turpit të mashtrimeve të tyre.

Edi Rama angazhoi Erion Veliajn dhe Lul Bravën për të trilluar në mënyrën më primitive, por dështuan dhe vetëm dështuan.

Së fundmi, prapë duhet të ndalem përsëri sepse dua ta kemi shumë të qartë që kjo betejë, një nga dimensionet më të shëmtuara ka luftën e kampit korruptiv dhe të korrupsionit kundër Sali Berishës dhe antikorrupsionit të tij dhe tuajën, të atyre që e besojnë Sali Berishën.

Shpikën, nga kulla dolën te dosja Partizani.

Burgosën një njeri, i cili për fajin e vetëm se është dhëndri i Sali Berishës, dhe ka marrë në përputhje me çdo ligj të vendit, 410 metra katrorë tokë.

Por unë do u them shqiptarëve se ky njeri, pavarësisht se Sali Berisha ka qenë për vite të tëra president dhe kryeministër, ka arritur të marrë as 0.1 përqind nga miliona metër katrorë tokë të trashëguar nga Tiranë në Shkodër, nga Hani i Hotit gjer në Divjakë. Familjet e tij.

Dhe tani i pret dështimi përfundimtar.

Në këtë betejë ne jemi të sigurt në fitoren tonë.

Në qoftë se me akuzat për korrupsion u shpalla non-grata, koha provoi se u riktheva edhe fuqishëm edhe njëherë në krye të PD.

Në qoftë se me akuzën për korrupsion në dosjen Partizani, vendosën Sali Berishën në arrest shtëpie, ju garantoj se kjo akuzë, se ky qëndrim, se kjo betejë e jona, do na çojë ne drejt fitores së sigurt.

Ne do fitojmë!

Ndaj dhe thirrja ime për çdo qytetar të këtij vendi, ngrihu me armën e të vërtetës se nuk ka armë më të pathyeshme se ajo.

Shpreh pakënaqësinë tënde me armën e të vërtetës. Mbro dinjitetin tënd me armën e të vërtetës.

Bashkohu këtu me këta burra dhe gra, djem dhe vajza, të ecim së bashku drejt fitores.

Drita e vërtetës do të ndriçojë çdo minutë, çdo orë, çdo ditë rrugën tonë drejt fitores.

Rroftë Shqipëria, rrofshi ju, rroftë opozita shqiptare.

Edi Rama, edhe në Surrel do vijë kjo dritë, do të pastrojë ty dhe kalbësirat e sarajeve tua.

Je i pashpresë!

Fitore, fitore, fitore!