Uglanin: Aleksandar Vuçiç nuk është president i boshnjakëve

Kryetari i Këshillit Nacional Boshnjak në Serbi, Sulejman Uglanin duke ju përgjigjur kryeministres serbe, Ana Bërnabiç e cila e akuzoi se “ka kaluar kompetencat duke ftuar ministrin e Jashtëm të Kosovës, Behgjet Pacolli”, tha se ajo nuk është kryeministre e boshnjakëve ashtu si edhe Presidenti, Aleksandar Vuçiç dhe zyrtarët tjerë që janë përfaqësues të përkohshëm  të pushtetit serb deri sa të përfundon dialogu me Kosovën.

Ana Bërnabiç dhe kolegët e saj, tha Uglanin, nuk duhet të dezinformojnë opinionin sepse Pacolli është ftuar në bazë të Nenit 6 të Ligjit mbi të drejtat dhe liritë e pakicave kombëtare dhe Këshilli Nacional Boshnjak është organi më i lartë politik dhe përfaqësues i boshnjakëve në Sanxhak, Serbi dhe Mal të Zi.

“Këshilli Nacional Boshnjak është zgjedhur me zgjedhje të drejtëpërdrejta, ashtu siç zgjedhet Presidenti i Serbisë,” tha Uglanin duke shtuar se  boshnjakët respektojnë lirinë e shprehjes së popullit serb, por Ana Bërnabiç nuk është kryeministre e boshnjakëve.

“As Vuçiç, as Daçiç, as Vulin. Ata janë diçka tjetër, ata zgjedhen në pjesën e mbetur të Serbisë, jashtë Kosovës. Ata janë institucione të përkohshme të Republikës së Serbisë, ashtu siç është Këshilli Nacional Boshnjak një institucion i përkohshëm i boshnjakëve deri sa të zgjidhet statusi i Sanxhakut  dhe statusi i boshnjakëve,” tha Uglanin duke i bërë thirrje BE-së, OSBE-së, OKB-së dhe KS të OKB-së që urgjentisht ti shqyrtojnë “kërcënimet e qeverisë serbe dhe rreziqet reale për boshnjakët”, ndërsa kërkoi nga BE që urgjentisht të organizoj bisedime në mes të përfaqësuesve të popullit boshnjak në Serbi dhe përfaqësuesve të shtetit serb në mënyrë që të zgjidhen çështjet.

I pyetur nëse ishte befasuar nga reagimi i pushtetarëve serbë, Uglanin tha se “të gjitha institucionet e përkohshme të Serbisë janë dëshmuar si armiqësore ndaj boshnjakëve “.