Çmimet e naftës ulen me 5 lekë për litër

Çmimet e naftës kanë shënuar një rënie të lehtë të dielën, duke u reduktuar me pesë lekë për litër.

Në pikat e tregtimit, një litër naftë tregtohet me 184 lekë, nga 189 lekë që ishte më parë. Benzina shitet me 183 lekë, nga 188 lekë.

Kjo është hera e parë që çmimet ndryshojnë këtë vit. Në nëntor-dhjetor të vitit të kaluar nafta shënoi dy ulje të njëpasnjëshme me rreth 10 lekë për litër. Kjo ishte hera e parë që çmimet e karburanteve kishin tendencë uljeje në vend, që nga muaji maj 2023, kur çmimet ishin rritur disa herë radhazi, nga niveli më i ulët në mëse një vit prej rreth 170 lekësh, që u arrit në maj 2023.

Gjithsesi, aktualisht, nafta është 8.2% më e shtrenjtë se në maj të një viti më parë.

Në qershor 2023 u shfuqizua Bordi që përcaktonte çmimet tavan të karburanteve, i cili ishte krijuar që në mars 2022, kur çmimet e karburanteve u rritën me shpejtësi pas sulmeve të Rusisë ndaj Ukrainës, duke arritur në tregun vendas deri në rekordin e 245 lekë për litër në prill 2022. Që pas shfuqizimit të Bordit, operatorët i ulën çmimet në nëntor, duke u justifikuar me nivelet e larta të arit të zi në bursat ndërkombëtare.

Sipas operatorëve të tregut, rënia e fundit lidhet me lehtësimin e çmimit të naftës në bursat ndërkombëtare. Një fuçi naftë tregtohet me 83.5 dollarë në bursa, nga gati 90 dollarë një muaj më parë.

Javën e kaluar, të dyja kontratat e së ardhmes të naftës, ajo europiane (brent) dhe amerikane (West Texas Intermediate -WTI) shënuan humbjen e tyre më të madhe javore në tre muaj. Brent që ra me më shumë se 7% dhe WTI me 6.8%.

Kjo tkurrje erdhi pasi investitorët morën në konsideratë të dhënat e dobëta të vendeve të punës në SHBA dhe kohën e mundshme të një uljeje të normës së interesit të Rezervës Federale.
Primi i rrezikut gjeopolitik në çmimet e naftës gjithashtu shënoi rënie si rrjedhojë e bisedimeve për një armëpushim në Gaza.

Megjithatë, perspektivat për një marrëveshje u reduktuan pasi Hamasi përsëriti kërkesën e tij për t’i dhënë fund luftës në këmbim të lirimit të pengjeve dhe Izraeli dukej i gatshëm për të nisur një sulm në Rripin jugor të Gazës, për të cilin ka kërcënuar prej kohësh.

Ndërkohë të hënën e kësaj jave, kontratat e së ardhmes së naftës u rritën sërish, pasi Arabia Saudite shtrenjtoi çmimet e naftës së papërpunuar për dorëzimet e qershorit për shumicën e rajoneve dhe pasi perspektiva për një marrëveshje armëpushimi në Gaza dukej e pakët, duke ripërtërirë frikën se konflikti Izrael-Hamas mund të zgjerohet në rajonin kryesor të prodhimit të naftës.

Kontratat e së ardhmes së naftës së papërpunuar Brent fituan 73 cent, ose 0,9%, në 83,69 dollarë për fuçi, ndërsa kontratat e së ardhmes së SHBA-së West Texas Intermediate ishin 78,95 dollarë për fuçi, me 84 cent ose 1,1%./Monitor/