Një vit nga sulmi në Zveçan, KFOR-i: Angazhimi për sigurinë i palëkundur! ICG ndryshon Raportin

Një vit më parë, paqeruajtësit e misionit të KFOR-it u sulmuan gjatë protestave të dhunshme në komunën e Zveçanit nga një grup protestuesish serbë. Në njëvjetorin e këtij sulmi KFOR-i ka theksuar se 93 ushtarë u lënduan në atë kohë, disa prej të cilëve me lëndime të rënda. Këto sulme, sipas KFOR-it ishin të paprovokuara dhe ishin krejtësisht të papranueshme.

Në njëvjetorin e sulmit ndaj KFOR-it në Zveçan, komandanti i KFOR-it, Gjeneralmajor Ozkan Ulutas tha se guximi i ushtarëve ndihmoi në stabilizimin e situatës në atë zonë dhe parandalimin e një përshkallëzimi të mëtejshëm të dhunës.

“Sot, ne nderojmë shërbimet dhe sakrificat e bashkëluftëtarëve tanë, të cilët vunë jetën e tyre në rrezik për t’i kryer detyrat e tyre për të gjitha komunitetet që jetojnë në Kosovë, në përputhje me mandatin. Guximi i tyre ndihmoi në stabilizimin e situatës në zonë dhe parandalimin e një përshkallëzimi të mëtejshëm të dhunës,” tha Gjeneralmajor Ulutas.

KFOR ka thënë se faktet duhet të vërtetohen dhe autorët duhet të mbahen përgjegjës. Pas dhunës, NATO ka dislokuar rreth 1000 paqeruajtës shtesë në Kosovë. KFOR ka trefishuar numrin e patrullave, duke përfshirë edhe kontrollet përgjatë vijës kufitare.

“Ky ka qenë përforcimi më i madh i kontingjentit tonë në Kosovë në një dekadë dhe kjo tregon se NATO është e gatshme të ruajë paqen”, ka theksuar KFOR.

Në fund, Komandanti i KFOR-it, Gjeneralmajor Ozkan Ulutas shprehet i bindur se do të jenë të palëkundur për të kontribuar në sigurinë e Kosovës dhe stabilitetit rajonal.

“Angazhimi ynë për të kontribuar për sigurinë e qëndrueshme në mbarë Kosovën dhe për stabilitetin rajonal është i palëkundur. KFOR-i vazhdon të ndërmarrë të gjitha veprimet e nevojshme për të ruajtur një mjedis të sigurt, në përputhje me mandatin e tij sipas Rezolutës 1244 të Këshillit të Sigurimit të Kombeve të Bashkuara të vitit 1999, në çdo kohë dhe në mënyrë të paanshme, për të mirën e të gjitha komuniteteve që jetojnë në Kosovë.” 

ICG ndryshon Raportin

Dhe, derisa Komandanti i KFOR-it, Gjeneralmajor Ozkan Ulutas, shprehet i bindur se ky mision i Aleancës Veriatlantike do të jetë i palëkundur për të kontribuar në sigurinë e Kosovës dhe stabilitetit rajonal, besueshmëria e KFOR-it u lëkund jo pak në Asamblenë Parlamentare të NATO-s e cila u zhvillua në Sofje, që detyroi dhe organizatën joqeveritare International Crisis Group ta ndryshoi Raportin më të ri ku kishte trajtuar situatën në veri të Kosovës ndonëse ICG ka për mision parandalimin e konflikteve në botë.

Raporti u përditësua në pjesën ku kjo organizatë kishtë deklaruar se KFOR-i ka negociuar me grupin paraushtarak serb për t’u larguar nga Banjska gjatë sulmit të 24 shtatorit.

Pas ndryshimit të një pjese të tekstit, Grupi Ndërkombëtar i Krizave, ICG, ka dhënë dhe një sqarim.

“Ky tekst u përditësua më 28 maj 2024. Versioni origjinal i këtij raporti gabimisht deklaroi se personeli i KFOR-it negocioi tërheqjen e grupit të armatosur serb nga bllokimi në Banjskë,” thekson Raporti i ICG-së.

Pjesë nga ky raport u përmendën edhe në një Draft të Raportit të prezantuar gjatë fundjavës në Asamblenë Parlamentare të NATO-s, ndërkohë KFOR-i mohoi këtë raportim.

“Kjo është e pasaktë. Në asnjë moment KFOR-i nuk ishte i përfshirë në negociatat e supozuara. Pasi u thirr për të përforcuar praninë e tij, KFOR-i u koordinua ngushtë me Policinë e Kosovës dhe misionin e BE-së për sundimin e ligjit, EULEX, për të rivendosur sigurinë në zonë,” thuhet në komunikatën e KFOR-it duke përfunduar:

 “NATO ka mbajtur gjithmonë qëndrimin se faktet duhet të vërtetohen dhe autorët duhet të përballen me drejtësinë. Pas dhunës, NATO ka dislokuar rreth 1000 paqeruajtës shtesë dhe forca të blinduara më të rënda në Kosovë. Ky ka qenë përforcimi më i madh i kontingjentit tonë në Kosovë në një dekadë; dhe kjo tregon se NATO është e gatshme të ruajë paqen.”