Në objektin e të dyshuarve për spiunazh serb, armë e pajisje ushtarake

Pas arrestimit të djeshëm nga Policia e Kosovës të dy të dyshuarëve për bashkëpunim me shërbimin sekret serb, BIA, me urdhër të Prokurorisë Speciale, policia në bashkëpunim me AKI-në kanë kontrolluar shtëpitë e dy të arrestuarve.

Në raportin 24 orësh të policisë thuhet se gjatë kontrollit në objektin e dy të dyshuarve meshkuj kosovarë, në cilësi të provave materiale janë gjetur dhe sekuestruar dokumente të ndryshme, kompjuter, telefona, USB, DVR, kaseta, armë dhe municione, maska ushtarake si dhe shumë dëshmi të tjera.

“Ferizaj – Policia e Kosovës në bashkëpunim me Agjencinë e Kosovës për Inteligjencë dhe Prokurorinë Speciale, pas ndërmarrjes së veprimeve hetimore lidhur me dyshimet për veprën penale spiunazhi me datë 05.06.2024 kanë realizuar operacion një policor për kontrollin e dy lokacioneve në qytetin e Ferizajit.

Gjatë kontrollit në lokacionin e dy të dyshuarve meshkuj kosovarë në cilësi të provave materiale janë gjetur dhe sekuestruar dokumente të ndryshme, kompjuter, telefona, USB, DVR, kaseta, armë dhe municione, maska, gasmaska ushtarake si dhe shumë dëshmi të tjera”. Dy të dyshuarit janë arrestuar dhe me vendim të prokurorit janë dërguar në mbajtje,” thuhet në raportin e Policisë së Kosovës.