Heqja e masave nga BE, Kurti: Nuk duhet të spekuloj për spekulimet!

Kryeministri i Kosovës, Albin Kurti, nuk i ka komentuar deklaratat e zyrtarëve të Bashkimit Evropian, të cilët i kanë quajtur spekulime, lajmet se do të hiqen masat e vendosura për Kosovën.

“Nuk mendoj se duhet të spekuloj për spekulimet,” tha i prerë Albin Kurti.

Duke reaguar ndaj deklaratës së Zv/Kryeministrit të Kosovës, Besnik Bislimit, “se ka informata se Borrell ka përgatitur raportin e tij dhe se ai ka propozuar heqjen e masave ndaj Kosovës”, Zëdhënësi i Bashkimit Evropian, Peter Stano, është shprehur se heqja e masave ndëshkuese ndaj Kosovës është çështje institucionale e vendeve anëtare dhe jo e dikujt nga jashtë që të përpiqet të spekulojë për përmbajtjen dhe afatet kohore.

“Do të bëhet në kohën që është e duhur për Përfaqësuesin e Lartë dhe shtetet anëtare dhe përmbajtjen do ta shohin dhe diskutojnë fillimisht shtetet anëtare dhe më pas të marrin vendimet e nevojshme. Dhe kur kjo të ketë ndodhur ose kur kjo do të ndodhë, do t’i njoftojmë kolegët tanë në Kosovë se cili është rezultati. Pra, nuk ka hapësirë dhe nuk shohim arsye për këto spekulime publike dhe njoftime nga aktorë të ndryshëm,” tha dje zëdhënësi i Bashkimit Evropian, Peter Stano.