Sot nis përzgjedhja e orarit të punës në Administratë, jo reduktimi! VKM…

Pasi u konsumua lajmi përmes mediave në shërbim të Edi Ramës për mëshirën që ka Kryeministri për administratën që punon në temperatura ekstreme të larta dhe redukton orarin e punës, Ministria e Shtetit për Administratën Publike dhe Antikorrupsionin sqaroi se nuk bëhet fjalë për shkurtimin e orarit të punës për punonjësit e administratës publike për shkak të temperaturave të larta ditë të fundit, por, për një ndryshim të propozuar nga kjo ministri që për pak orë u shndërrua në VKM, dhe përcakton rregullat e reja të kohëzgjatjes në punës me një orar fleksibël ku vetëm fasha orare 9:30-15:30 vlenë për të gjithë dhe 2 orë janë që çdo individ i administrat publike mund ti përzgjedhë duke plotësuar kuotën e 8 orëve dhe 30 miniuta që vlenë për të gjithë si orar i plotë i një dite pune me përjashtim të ditës së premte ku është 6 orë dhe fasha e domosdoshme është, 9:30-13:00.

“Kjo iniciativë vjen si përgjigje për të përmirësuar fleksibilitetin dhe efikasitetin në administratën publike, duke reflektuar nevojat e punonjësve për një orar më të përshtatshëm dhe një balancim më të mirë të jetës dhe punës. Ky ndryshim nuk është i lidhur me temperaturat e larta të ditëve të fundit, sikurse është publikuar në disa portale, por me injektimin në mënyrë të qëndrueshme të fleksibilitetit në punë,” saktëson Ministria e Shtetit për Administratën Publike dhe Antikorrupsionin pasi lajmi mbi Edi Ramën e kujdesshëm për administratën publike kishte marrë dhenë dhe jo vetëm nga portalet por të gjitha televizionet, dhe, përpiqet përmes një njoftimi të sqaroj se për çfarë ndryshimi bëhet fjalë:

“Ministri i Shtetit për Administratën Publike dhe Antikorrupsionin ka propozuar një ndryshim në VKM nr. 568, datë 6.10.2021 “Për miratimin e rregullave për kohëzgjatjen e punës dhe të pushimit, orët shtesë dhe kompensimin e tyre në institucionet e administratës shtetërore, institucionet e pavarura dhe njësitë e vetëqeverisjes vendore”, që prezanton për herë të parë në administratën publike konceptin e orarit ditor fleksibël.

Fleksibiliteti në orarin e punës ka qenë një kërkesë kryesore e shprehur nga punonjësit e administratës, me qëllim krijimin e një mjedisi pune më mbështetës për të gjithë.

Projektvendimi propozon që brenda kohëzgjatjes ditore të punës, të punësuarit të kenë mundësinë të zgjedhin oraret kur do të kryejnë orët e plota të ditës së punës, duke caktuar një fashë orare kur të gjithë nëpunësit duhet të jenë në punë,” thekson Ministria e Shtetit për Administratën Publike dhe Antikorrupsionin duke specifikuar:

“Në kuadër të këtij projektvendimi propozohet në institucionet e administratës shtetërore:
• Kohëzgjatja ditore e orëve të punës të jetë 8 orë e 30 minuta nga e hëna deri të enjten dhe 6 orë ditën e premte.
• Orari ditor i punës të jetë fleksibël, me kushtin që të plotësohen orët e plota (pra 8.5 orë dhe 6 orë).
• Fasha e detyrueshme orare kur të gjithë nëpunësit duhet të jenë në vendet e tyre të punës, të jetë çdo ditë nga ora 9:30 deri në 15:30, ndërsa ditën e premte nga ora 9:30 deri në 13:00.”

Dhe, pasi është i qartë fakti se orari i punës nuk reduktohet por i shtohet një fashë për ta quajtur orar pune fleksibël, ashtu siç e ka të qartë Edi Rama se shqiptarët nuk lexojnë dokumenta por dërgjojnë liderin, Këshilli i Ministrave publikon Vendimin:

VENDOSI:
Në vendimin nr. 568, datë 06.10.2021, të Këshillit të Ministrave, “Për miratimin e rregullave për kohëzgjatjen e punës dhe të pushimit, orët shtesë dhe kompensimin e tyre në institucionet e administratës shtetërore, institucionet e pavarura dhe njësitë e vetëqeverisjes vendore”, bëhen shtesat dhe ndryshimet si vijon:
1. Në kreun II:
a) Pika 2, ndryshohet me përmbajtjen si vijon:
“2. Kohëzgjatja ditore e orëve të punës për të punësuarit në institucionet e administratës shtetërore:
a) Është çdo ditë 8 orë e 30 minuta, ndërsa ditën e premte është 6 orë.
b) Për këto institucione aplikohet orari ditor i punës fleksibël, me kushtin që të plotësohen orët e plota sipas përcaktimit në shkronjën “a”, të kësaj pike.
c) Orari i detyrueshëm kur të gjithë të punësuarit duhet të jenë në vendet e punës është çdo ditë 9:30 – 15:30, ndërsa ditën e premte 9:30 – 13:00.”.
b) Pas pikës 2, shtohet pika 2/1, me përmbajtjen si vijon:
“2/1 Orari ditor i punës për të punësuarit, në institucionet e pavarura dhe njësitë e vetëqeverisjes vendore, përcaktohet në rregulloren e brendshme të institucionit.”
2. Në kreun III:
a) Në fund të pikës 2, shtohet fjalia me përmbajtjen si vijon:
“Titullari i institucionit/sekretari i përgjithshëm, kanë të drejtë ta delegojnë kompetencën e përcaktimit të kohës së kryerjes së pushimit vjetor të paguar tek drejtuesi i njësisë së burimeve njerëzore të institucionit.”
b) Në fund të pikës 15, shtohet fjalia me përmbajtjen si vijon:
“Titullari i institucionit/sekretari i përgjithshëm, kanë të drejtë ta delegojnë kompetencën e përcaktimit të kohëzgjatjes së pushimit pa të drejtë page tek drejtuesi i njësisë së burimeve njerëzore të institucionit.”
Ky vendim hyn në fuqi pas botimit në “Fletoren zyrtare”.

Ndryshe, edhe ky orar pune fleksibël i Edi Ramës nuk është se i zgjidhë gjë shqiptarëve të cilët vazhdojnë të renditen me pagat më të ulëta në Europë, dhe të dytët me mesataren javore të punës më të lartë 43.7 pas Turqisë ku punohet 44.2 orë në javë.

Ndërkohë sipas Eurostat, mesatarja e Bashkimit Europian në vitin 2023 ishte 36.1 orë në javë, nga 36.4 sa ishte në vitin 2022.