Haradinaj: “Zymberi ra duke e mbrojtur Kosovën e pavarur”

Kryeministri i Kosovës, Ramush Haradinaj, ka bërë homazhe te lapidari i Heroit të Kosovës, Enver Zymberi, në përvjetorin e shtatë të rënies së tij, raporton Koha.net.

Para drejtuesëve të lartë të Policisë së Kosovës, kryeministri Haradinaj nderoi veprën heroike të Enver Zymberit.

“Lavdi për Enverin, lavdi për veprën dhe sakrificën e tij”, tha kryeministri Haradinaj.

Kryeministri Haradinaj dhe Qeveria e Kosovës, ka shprehë nderimet më të sinqerta për familjen e policit të rënë në detyrë, Heroit të Kosovës, Enver Zymberi, në shtatë vjetorin e rënies së tij në krye të detyrës dhe në mbrojtje të kufijve të atdheut, të ligjshmërisë dhe kushtetutshmërisë në veriun e Kosovës.

“Enver Zymberi ra duke e mbrojtur Kosovën e pavarur. Lavdi”, tha kryeministri Haradinaj.

Enver Zymberi, ndërroi jetë më 26 korrik 2011, si rezultat i plagëve të marra nga sulmi i turmave të dhunshme që tentuan të bllokonin vënien e ligjshmërisë dhe kushtetutshmërisë në pikat kufitare në veri të Kosovës.