Raundi i ri i dialogut Kosovë-Serbi, më 24 tetor në Bruksel

I dërguari i Bashkimit Evropian për dialogun Kosovë-Serbi, Miroslav Lajçak, do të organizojë javën e ardhshme një takim të kryenegociatorëve.

Mësohet se takimi me kryenegociatorin Kosovar Besnik Bislimi si dhe homologun e tij nga Beogradi, Petar Petkoviç, është planifikuar me 24 tetor.

Sipas burimeve të BE-së, qëllimi i takimit është të diskutohen mënyrat se si të ecet përpara në procesin e dialogut, me theks të veçantë në domosdoshmërinë e zbatimit të marrëveshjes për rrugën drejt normalizimit të marrëdhënieve.

Ndonëse ftesa është dërguar tek palët, dhe ato duket se e kanë konfirmuar pjesëmarrjen në takim me Miroslav Lajçak, takimi i përbashkët Bislimi-Petkoviç mbetet i pasigurt.

Ndryshe, takimi i fundit i këtij lloj formati është zhvilluar më 17 shtator në Bruksel, kur kryenegciatorët zhvilluan takime me të dërguarin e Bashkimit Evropian për dialogun Kosovë-Serbi, Miroslav Lajçak, por nuk pranuan të takoken bashkë.