Në vendkalimet kufitare Shqipëri-Kosovë, nga 1 nëntori rikthehen kalimet e përshpejtuara

Kjo e shtunë në vendkalimin kufitar Morinë është shoqëruar me numër të lartë automjetesh dhe udhëtarësh. Edhe pse temperaturat janë ulur ndjeshëm, qytetarët e Kosovës janë të shumtë në numër që shkojnë drejt Shqipërisë.

Për sa i përket kalimeve me kontrolle në këtë pikë, duke filluar nga 1 nëntori do të rikthehet procedura me kalim të përshpejtuar deri më 28 shkurt për të gjithë automjetet me targa të Shqipërisë dhe Kosovës.

Gjatë 24 orëve të fundit në këtë pikë kufitare kanë hyrë dhe dalë nga Shqipëria mbi 11 mijë udhëtarë. Kalimtarët që presin e vlerësojnë këtë marrëveshje që lehtëson udhëtimin pa krijimin e radhëve të gjata në sportele.