Turizmi, vjeshta si kompensim i gabimeve të verës

Saranda dhe Ksamili duket se ia kanë dalë të rregullojnë imazhin e tyre kaotik të verës, me rritje të numrit të turistëve në periudhën e vjeshtës. Falë kohës së mirë, çmimeve preferenciale që kanë strukturat gjatë këtyre muajve, por edhe një shërbimi më të mirë, duket se shtator-nëntori kanë bërë që vizitorët të jenë të kënaqur.

Në Golem, nga ana tjetër, janë rikthyer shqiptarët e Kosovës në numër të konsiderueshëm vetëm në fillim të nëntorit. Pas rënies së shënuar në shtator duket se ky është lajmi i mirë për strukturat akomoduese,të cilat shprehen se është ndier mungesa e Kosovës. Shëngjini, edhe pse ka një numër më të ulët turistësh individualë në këtë periudhë, ka kërkuar rritjen te segmenti i turizmit të konferencave dhe eventeve, diçka që ka siguruar gjallëri për këtë rajon edhe në vjeshtë.

Turizmi në vjeshtë

Vjeshta supozohej që gjallërinë që sjell sektori i turizmit, ta transferonte në pjesën e brendshme dhe ato malore të vendit, por koha e mirë ka favorizuar që bregdeti të mbetet gjithashtu i preferuar.
Kjo ka variuar nga rajoni në rajon, por operatorët turistikë raportojnë se, prurjet e të huajve kanë vijuar gjatë periudhës shtator-nëntor, duke kompensuar disi lëkundjen që u vu re gjatë verës.
Kjo e fundit, e vënë re kryesisht në Jug, erdhi si efekt i një rritjeje të beftë të çmimeve që u bënë virale në rrjete sociale, pikërisht në kohën kur Shqipëria ishte ndër destinacionet me rritjen më të shpejtë dhe me një vëmendje të shtuar.
Efekti bumerang ishte i menjëhershëm, duke bërë që sezoni veror 2024 të cilësohej si më i dobët se sezoni veror 2023.
Pavarësisht kësaj, viti 2024 pritet të jetë një vit më i mirë në tërësi për turizmin, edhe si efekt i rritjes së konsiderueshme në pranverë, por edhe i interesit të shtuar në vjeshtë.
Por cilët janë në fakt turistët që po na vizitojnë në këtë periudhë dhe si paraqitet ecuria e secilit prej rajoneve në vend?

Vjeshta “përmirëson imazhin” e Ksamilit dhe Sarandës
Ksamili dhe Saranda, dy destinacionet më popullore të Shqipërisë në rrjetet sociale dhe të promovuara gjerësisht me “Maldive të Europës” përjetuan këtë verë një bumerang tërësisht negativ të imazhit të tyre.
Çmimet, shërbimi dhe situata me shezlonet ishin pikat më të kritikuara të vizitorëve, të cilët të nisur drejt një destinacioni të marketuar si ekonomik, përballeshin me një realitet krejt tjetër.
Por vjeshta ka sjellë një panoramë të përmirësuar për këtë rajon, ku çmimet preferenciale që karakterizojnë këtë periudhë, por edhe një shërbim më cilësor që nuk cenohet nga fluksi që ka vera, kanë shënuar një pikë kthese pozitive të perceptimit të turistëve.
Periudha e vjeshtës ka qenë premtuese dhe ndryshe nga gjithë vitet e tjera, me një lëvizje të konsiderueshme në numrin e turistëve. Shtatori nuk ishte si muajt shtator të viteve të mëparshme.
Ishte jashtë pritshmërisë për numrin e vizitorëve dhe gjallërinë që ofroi në bregdetin e Sarandës dhe Ksamilit. Kjo tendencë vijoi edhe në tetor, që ishte jashtë parashikimeve, në aspektin pozitiv.
Çmimet e kësaj periudhe kanë qenë çmime preferenciale të pranueshme për turistët.
Sot që flasim, që është nëntor dhe jemi në fund të vjeshtës, nuk ka asnjë debat apo koment negativ mbi këto çmime.
Edhe shërbimi gjatë kësaj periudhe duke qenë se nuk jemi në pik sezoni, ka qenë më i mirë dhe natyrisht, përshtypja apo shija që lë te pushuesit që po na vizitojnë, tani është vetëm e mirë”, – pohon Arben Çipa administrator i “Sipa Tours” lidhur me ecurinë e stinës së vjeshtës për rajoni e Sarandës dhe Ksamilit.
Ai tregon se kryesisht vizitorët janë të organizuar ose dhe individë që kanë interes për aspektin kulturor pavarësisht se koha e mirë ka lënë edhe mundësinë e pak orëve plazh. “Vizitojnë Lëkurësin, Parkun e Butrintit, vizitojnë Gjirokastrën.
Ky rajon është stacion i një turi disaditor dhe qëndrimet nuk janë të gjata, ama janë mjaftueshëm për ta mbajtur të gjallëruar qytetin dhe bregdetin edhe në këtë stinë”, – nënvizon ai.

Shqiptarët e Kosovës rikthehen në fund të vjeshtës në zonën e Golemit
Prania e shqiptarëve të Kosovës gjatë këtij viti në bregdetin shqiptar ka qenë e zbehtë dhe kjo ka ardhur për një sërë arsyesh. Së pari, një nga elementet që u duk se dha ndikimin më të madh ishte perceptimi se Shqipëria u bë një vend më i shtrenjtë.
Në fakt ky perceptim u krijua për gjithë bregdetin pavarësisht se ishte i materializuar vetëm në disa rajone të tij. Në zona si Velipoja apo Shëngjini, ku çmimet ishin më ekonomike, ky grup turistësh vijoi të ishte i pranishëm edhe gjatë verës.
Një tjetër arsye ishte zhvlerësimi i Euro-s përballë Lekut çka automatikisht i bënte pushimet në Shqipëri më të shtrenjta se një vit më parë. Një tjetër element ishte liberalizimi i vizave për Kosovën, çka u dha mundësinë këtyre shtetasve të eksplorojnë vende të tjera.
Shtatori ishte muaji i parë kur zyrtarisht rënia e Kosovës në vend u pranua edhe nga shifrat e publikuara nga qeveria. Por duket se fundi i vjeshtës e ka rikthyer këtë grup në Shqipëri në turizmin e fundjavave.
“Fatmirësisht, Kosova ka filluar të rikthehet. Javën që kaloi (2-3 nëntor) ishte në numra të konsiderueshëm. Edhe në këtë rast, bëhet fjalë për fundjavat, por shpresojmë që kjo tendencë të vijojë dhe të fillojnë të rikthehen.
Si një turist që ka qenë historikisht pjesë e strukturave në Durrës dhe Golem, këtë vit është ndier mungesa e tyre. Ky grup është shumë i rëndësishëm për turizmin tonë, pasi janë të pranishëm gjatë gjithë vitit dhe janë një ndihmë shumë e madhe.
Sigurisht që turizmi gjithëvjetor nuk mund të mbahet vetëm me vendasit dhe shqiptarët e Kosovës, ka nevojë që ne të kthehemi në një vend tërheqës, që merr pranë vetes diversifikim të grupeve”, – tha Fatos Çerenishti, administrator i “FAFA Group”. Sipas tij zgjatja e sezonit apo synimi për një turizëm gjithëvjetor duhet të vijë i kombinuar duke kërkuar alternativa të tjera apo duke dhënë dhe masa nxitëse. Lidhur
me pritshmëritë për në vijim ai nënvizon se është pozitive që për Shqipërinë vijon të ketë interes nga turizmi i organizuar dhe tregues janë kontratat e vitit 2025.
“Ne, prej shtatë vitesh, vijojmë të punojmë me të njëjtën kompani sa u takon kontratave të garancisë. Janë kryesisht kontrata me çekë, polakë apo gjermanë në një masë më të vogël. Po kështu, kemi edhe marrëveshje “allotment”, pra që paguan aq sa sjell, por me një rezervim paraprak.
Risi e këtij sezoni që vjen janë anglezët, pasi kanë shprehur interes për Shqipërinë dhe testimi i tyre i parë është me “alltoment”. Vëmë re gjithashtu se tregu gjerman ka më shumë interes për Shqipërinë. Nëse për disa vite me radhë ishte vetëm një kompani, tashmë janë disa prej tyre në konkurrencë për të sjellë turistë nga ky vend” shprehet Çerenishti.

Turizmi i konferencave dhe eventeve mban aktiv Shëngjinin
Vjeshta ka rezultuar pak më e zbehtë për bregdetin e Shëngjinit sesa për pjesën tjetër më në Jug të vendit sa u takon turistëve të organizuar dhe individualë, megjithatë situata ka qenë më mirë se e njëjta periudhë në vitet të mëparshme.
Një zhvillim pozitiv që duket se ka pasur në këtë rajon dhe kryesisht në strukturat e mëdha është orientimi drejt turizmit të konferencave dhe eventeve, si një formë për të zhvilluar turizmin gjithëvjetor.
“Ne kemi pasur një ecuri goxha të mirë, që i atribuohet më shumë turizmit të seminareve dhe konferencave ku kemi pasur një sërë rezervimesh të kësaj natyre.
Klientë individualë apo familje nuk kemi pasur shumë, por nuk na kanë munguar. Kryesisht bëhet fjalë për 20-25 dhoma të rezervuara. Janë të fokusuar kryesisht te fundjava” pohon Bledar Shima, menaxher i “Maritim Rafaelo Resort”.
Ai nënvizon se pavarësisht zbehjes që ka pasur prania e shqiptarëve të Kosovës në pjesën tjetër të vendit gjatë këtij viti, në Shëngjin ata nuk kanë munguar.
Shëngjini duket se tashmë po merr vëmendjen edhe të operatorëve turistikë të huaj, të cilët kanë lidhur kontrata garancie për vitet e ardhshme dhe numri i rezervimeve edhe pse modest, shënon rritje. “Kemi nënshkruar kontrata garancie për tregun polak.
Nga viti në vit, numri vjen në rritje. Për shembull, kontratat që kemi për vitin 2025 janë dyfishuar në raport me këtë sezon që lamë pas dhe rriten edhe më tej në vitin 2026, sipas marrëveshjeve që kemi bërë.
Në total, ne kemi 657 dhoma dhe apartamente që kanë një kapacitet 2000-2100 shtretër, por vetëm një pjesë modeste e tyre është me garanci aktualisht” shprehet z.Shima./Monitor/