Amendamentet e PD, Berisha: Nesër në orën 17:00, Protesta kundër Buxhetit 2025
Buxheti më i madh në histori prej 8.2 miliardë eurosh, i cili në mënyrë tragjike, në vend se të jetë njëkohësisht dhe buxheti i mbështetjes më të madhe për qytetarët, Kryetari i Partisë Demokratike, Sali Berisha, e vlerësoi se është buxheti i vjedhjes më të madhe në historinë e vendit.
Me këtë rast, Kryetari i PD prezantoi amendamentet të cila do ti paraqes Grupi Parlamentar i Partisë Demokratike:
1. Minimumi jetik 200 euro për çdo shqiptar.
2. Rritja e pensioneve dhe pesëfishimin e fondit për rritjen e tyre, pra nga 16 mln euro në 80 mln euro.
3. Trefishimi i fondeve për të përndjekurit politikë, (nga 1.2 miliardë leke në 4.2 miliardë lekë).
4. Rritja me 1% të PBB-se të buxhetit të arsimit (dhe rritje graduale me 1% çdo vit derisa të arrijë në shifrën 5 përqind).
5. Rritja me 1% te PBB-se të buxhetit të shëndetësisë (rritje graduale me 1% çdo vit gjer në shifrën 5 përqind).
6. Rritje me 50% të fondeve për barnat e rimbursueshme (60 mln euro shtesë). Kanë hequr nga rimbursimi ilaçet jetike, sidomos për pensionistët dhe të tjerë.
7. Pezullimi i menjëhershëm i të gjitha pagesave buxhetore për PPP-të në shëndetësi (përveç dializës).
8. Rritja me 10% e pagave të gjithë administrates publike (përveç pagave të larta).
9. Rritje me 20% të pagave të mësuesve dhe pedagogëve, mjekëve dhe infermierëve.
10. Fondi për kërkimin shkencor rritet në 20 milionë euro.
11. Rritja e transfertës së pakushtëzuar për bashkitë me një shtesë prej 130 milionë euro.
12. Mbështetje e prodhimit vendas me 50 mln euro.
13. Katërfishim i subvencionit për fermerët, blegtorët dhe agroindustrinë, nga 30 në 120 mln euro.
14. Rritja jo më pak se 15 mln euro shtesë fondeve për Spitalin Onkologjik duke vendosur 10 përqind të akcizës.
15. Përgjysmimi i shpenzimeve operative të qeverisjes qendrore dhe vendore (pa cenuar shpenzimet jetike, të sigurisë dhe vendimet gjyqësore të formës së prerë).
16. Trefishimi i fondeve për mirëmbajtjen e rrugëve,” tha Sali Berisha duke vlerësuar se kjo është fytyra e buxhetit që paraqet sot PD në parlament.
“Me këtë buxhet, të dashur qytetarë, nuk kemi lënë asnjë vepër publike pa vazhduar punën, por së pari kemi barazuar apo kemi përparësuar investimin në radhë tek njeriu dhe pastaj te kapitali fizik.
Së dyti, pjesëtohet me 10 çmimi i ndërtimit të rrugëve dhe punëve të tjera publike dhe parashikohet çmimi mesatar i ndërtimit si në vendet e BE,” tha lideri i opozitës ndërsa bonusin e fundvitit që premtoi Kryeministri në prezantimin e Buxhetit 2025, e vlerësoi si paratë që Edi Rama ua vodhi pensionistëve nga muaji Mars deri në Tetor
“Pa diskutim kjo është fytyra e vërtetë e tij, e Edi Ramës. Së pari, bonusi i fundvitit janë paratë që Edi Rama u vodhi pensionistëve nga muaji mars gjer në muajin tetor, të cilët sipas ligjit të parlamentit, që nuk mund ta ndryshojë asnjë qeveri përveç parlamentit, duhet të merrnin shtesën 4 përqind duke nisur nga data 1 mars.
Edi Rama çfarë bëri? Nuk ua dha, i mashtroi, i përçmoi, i përbuzi dhe shumën e krijuar nga marsi në tetor, do ta japë për bonus,” tha Kryetari i Partisë Demokratike duke i bërë thirrje shoqatave të pensionistëve, të formulojnë dosjen, të padisin hajdutin në gjykatë, se nuk po u jep bonus, po i mashtron.
“Ato para ju duhet ti merrni si 4 përqind e pensionit tuaj, çdo muaj. Por ai nuk ua dha. I pashpirt.
Ndërkohë që rriti rrogat me 5 herë rrogat e larta dhe vitin e ardhshëm ka parashikuar gjithsej, 16 mln për indeksimin tuaj.
U bëj thirrje pensionistëve nesër të gjithë tek parlamenti, është dita që shqiptarët të dëgjojnë zërin e tyre, është dita që bota të dëgjojë zërin e tyre, është dita në të cilën çdo pensionist shqiptar duhet të tregojë veten siç është, burrë, grua kurajoz, guximtar që nuk lejon të shkelmohet mbi dinjitetin e tij, të përçmohet, të përbuzet nga një bandë që e vjedh ditë për ditë,” tha Kryetari Partisë Demokratike, Sali Berisha, duke përfunduar me thirrjen:
“Nesër në ora 5 pasdite, të gjithë para parlamentit për të mbështetur opozitën dhe amendamentet e saj në parlament.”
