Dita e Forcës, Kurti: Do hapim fabrikën për prodhimin e municionit
Sot në Ditën e Forcës së Sigurisë, Kryeministri Albin Kurti ka bërë të ditur se janë ndërmarrë hapa drejt hapjes së fabrikës për prodhim të municionit si dhe dizajnimin e dronëve.
“Do të themelojmë Komisionin Ndërministror për nisjen e procedurave dhe negociatave lidhur me hapjen e fabrikës për prodhimin e municionit dhe për laborator për dizajnimin e fluturakeve pa pilot në Republikën e Kosovës. Një ushtri që për një kohë kaq të shkurtër është armatosur si kjo e jona ka nevojë për ta siguruar dhe garantuar operacionalitetin e plotë dhe qëndrueshmërinë,” tha Albin Kurti sot në mbledhjen e Qeverisë së Kosovës duke rikujtuar se mbrojtja ka qenë ndër prioritetet kryesore të kësaj qeverie ndërsa përfundoi:
“Kjo mbledhje e sotme po mbahet me të njëjtën ditë me ditën e ushtrisë. Qeveria jonë ka treguar se mbrojtja ka qenë ndër prioritetet tona kryesore dhe kjo është dëshmuar si me numrin e ushtarëve që është dyfishuar, si me buxhetin për ushtri që është trefishuar.”
Pas mbledhjes së Qeverisë së Kosovës, Ministri i Mbrojtjes, Ejup Maqedonci tha se vendimi për formimin e Komisionit do të vë bazat për hapjen e fabrikës për prodhimin e municionit ndërsa bëri të ditur se ka pranuar një raport fizibiliteti nga Ministria e Mbrojtjes në Turqi, dhe se janë koordinuar me partnerët e Kosovës.
“Kryeministri ka nënshkruar vendimin për formimin e një komisioni i cili do të vë bazamentin e industrisë ushtarake për herë të parë në Kosovë. Ky komision do të hulumtoj dhe do të diskutoj rreth hapjes së një fabrike shtetërore për prodhimin e municionit. Për këtë ne jemi koordinuar me partnerët tanë. Ne kemi pranuar edhe një raport fizibiliteti nga Republika e Mbrojtjes së Turqisë. Edhe për fluturaket kemi diskutime me shumë partnerë,” tha Ministri i Mbrojtjes i Kosovës, Ejup Maqedonci, duke përfunduar:
“Por, e rëndësishme është që me hapjen e fabrikës së monicionit vendi ynë po bënë një hapë më tej në aspektin e kompletimit të infrastrukturës së përgjithshme të sigurisë.”
